ئاڤا بەدواداچوون بۆ دابەشنەکردنی کتێب بەسەر زیندانیانی چاکسازیی سلێمانیدا دەکات

ئاڤا نیوز

ماوەی چەند ڕۆژێکە کتێب بەسەر زیندانیانی چاکسازیی سلێمانیدا دابەش نەکراوە، بەشێک لە زیندانییەکان دەڵێن، بەهۆی شاسوار عەبدولواحیدەوەیە، بەڕێوەبەری چاکسازییەکەش هۆکارەکەی بۆ ڕێکخستنەوە و پاککردنەوەی کتێبخانەکە دەگەڕێنێتەوە.

چیرۆکی سەرەکی: بە گوتەی چەند زیندانییەک لە چاکسازیی گەورانی سلێمانی، لەوەتەی شاسوار عەبدولواحید براوەتە زیندانەکە، دابەشکردنی کتێب بەسەر زیندانیاندا وەستاوە، چونکە دیدارە تایبەتەکانی شاسوار عەبدولواحید لەو هۆڵە دەکرێن و وەک زیندانیانی دیکە نایەتە هۆڵی گشتی.

لێدوانی فەرمی: ئیحسان عەبدولڕەحمان، بەرێوەبەری گشتیی چاکسازییەکانی هەرێمی کوردستان بە ئاڤای ڕاگەیاند: پێنەدانی کتێب بە زیندانیانی چاکسازییەکە لە ڕۆژانی ڕابردوو، بۆ ڕێکسختن و پاککردنەوەی تەواوەتی کتێبخانەکە دەگەڕێتەوە و هیچ هۆکاریکی دیکەی لە پشتەوە نەبووە.

زانیاریی زیاتر: بە گوتەی ئیحسان عەبدولڕەحمان، ئێستا کتێبخانەی چاکسازیی گەورانی سلێمانی کراوەیە، تەنیا ئەمرۆ 13 کتێب بە یەک زیندانی دراون، چەند کتێبێکی نێو کتێبخانەکەش لابراون و کتێبی نوێ لە شوێنیان دانراوە.