ئەنجوومەنی نیشتمانیی كورد لەسەر بانگهێشتنامەی دیمەشق ڕەزامەندە و پەیەدە ڕەتیدەكاتەوە

ئاڤا نیوز

سەرۆکایەتیی ئەنجوومەنی نیشتمانیی کورد لە سووریا ڕایدەگەیەنێت، پەیامێکیان لە حکومەتی نوێی سووریاوە پێگەیشتووە بۆ سەردانیكردنی دیمەشق و بانگهێشتنامەكەیان قبووڵ كردووە و وتوێژی لەبارەوە دەكەن.

وێنە گەورەكە: سەرەڕای ڕێككەوتنی واژۆكراوی نێوانیان، دیمەشق و هەسەدە، لە چەند خاڵێك ناكۆكن، لەگەڵ ئەوەشدا دەرگەی گفتوگۆ دانەخراوە و هەوڵە دیپلۆماسییە نێودەوڵەتی و ناوخۆییەكان بەردەوامن بۆ لێكنزیككردنەوەی لایەنەكان و نەهێشتنی خاڵە ناكۆكەكان.

لێدوانی فەرمی: بەگوێرەی هەواڵێكی ڕوانگەی سووری بۆ مافەكانی مرۆڤ، سلێمان ئۆسۆ، ئەندامی ئەنجوومەنی نیشتمانیی كورد لە سووریا دووپاتیکردەوە ئەندامانی ئەنجوومەنەكە ڕێککەوتوون بچنە دیمەشق، باسی لەوەشكرد كە هێشتا وادەی گفتوگۆکان لەگەڵ بەرپرسانی باڵای حكومەتی سووریا دیارینەکراوە.

ئاماژەی بەوەشکرد، بڕیارەکانی کۆنفڕانسی هاوهەڵوێستی کورد لە 26ـی مانگی نیسانی ئەمساڵ، بۆیان گرنگ بووە و نەچوون بۆ دیمەشقیش شتێکی سەرسوڕهێنەر نابێت.

بۆچوونی لایەنی بەرامبەر: پەروین یوسف، هاوسەرۆکی پارتی یەکێتیی دیموکرات پەیەدە، ڕەتکردنەوەی پارتەكەی بۆ بڕیارەکەی ئەنجوومەنی نیشتمانیی کورد دووپات كردەوە و ڕایگەیاند کە بڕیارەکەی ئەنجوومەنەكە تاکلایەنە و قبوڵکراو نییە و جەختی لەوە کردەوە کە ئەوان دژی هەر هەنگاوێکی لەو شێوەیەن.