بە بڕیاری مەسرور بارزانی زەوی بە مامۆستا و فەرمانبەرانی خوێندنی کوردیی کەرکووک دەدرێت

ئاڤا نیوز

بە بڕیاری سەرۆکوەزیران مەسرور بارزانی، هاوشێوەی فەرمانبەرانی هەرێمی کوردستان زەوی بە مامۆستا و فەرمانبەرانی خوێندنی کوردیی کەرکووک، لە سنووری شاری هەولێر دەدرێت و بەڕێوەبەری خوێندنی کوردیش دەڵێ، بەم نزیکانە دەست پێ دەکات.

وێنە گەورەکە: بە بڕیاری سەرۆکوەزیران مەسرور بارزانی، پرۆسەی دابەشکردنی زەوی بەسەر سەرجەم فەرمانبەرانی حکومەتی هەرێمی کوردستان دەستی پێکردووە و بەپێی کارتی زانیاریی فەرمانبەرەکان زەوییەکان لە سنووری شارەوانییەکان دابەش دەکرێن.

لێدوانی فەرمی: کامەران عەلی، بەڕێوەبەری خوێندنی کوردی لە کەرکووک بە ئاڤا میدیای ڕاگەیاند لە ماوەی ڕابردوودا، سەرۆکوەزیران مەسرور بارزانی بریاریدا کە ئێمە لە فەرمانبەرانی هەرێمی کوردستان جیا نەکاتەوە و مامۆستا و فەرمانبەرانی خوێندنی کوردی لە کەرکووک هاوشێوەی هەر فەرمانبەرێکی دیکەی حکومەتی هەرێمی کوردستان زەوییان پێ بدرێت، ئێستا ئامادەکارییەکان بۆ ئەو مەبەستە لە قۆناغی کۆتاییدایە.

-پرۆسەکە 5841 مامۆستا و فەرمانبەری خوێندنی کوردی لە کەرکووک دەگرێتەوە، ئەو کەسانە دانیشتووی کەرکووکن و زەوییان لە شارەوانییەکانی هەولێر پێدەدرێت، پرۆسەکە لە کۆتاییدایە و بەم نزیکانە دابەشکردنەکە دەستپێدەکات

-ئەو زەوییانەی کە بە مامۆستا و فەرمانبەرانی خوێندنی کوردی دەدرێن لە باشترین شوێنەکانی هەولێرن و دابەش بوونە بەسەر چەند شوێنێک.