"مەدخەلییەکان" مەلایەک لە باشووری عێراق تیرۆر دەکەن

ئاڤا نیوز

ئەمڕۆ هەینی 12ـی ئەیلولی 2025، دیوانی وەقفی سوننە ڕایگەیاند، عەبدولسەتار قەرەغولی، ئیمام و وتارخوێنی مزگەوتی کەریم ئەلناسر لە ناوچەی دۆرە لە باشووری بەغدا "تیرۆر کرا"، ئەوەش لە ئەنجامی ناکۆکیی نێوان مەلاکە و گرووپی سەلەفییەکانی "مەدخەلی" لەسەر وتاری هەینی.

چیرۆکی سەرەکی: مەلایەک بە ناوی عەبدولسەتار قەرەغولی و ئەندامانی ڕەوتی مەدخەلییەت لەسەر وتاری هەینی دەبێتە ناکۆکییان، مەدخەلییەکان دەیانەوێت مەلایەک سەر بە خۆیان لە شوێنی قەرەغولی دابنێن و زیاتر لە 30 ئەندامانی خۆیان لە دەرەوەی ناوچەکە هێناوە و ویستویانە مەلای خۆیان بسەپێنن، لە ئەنجامی ئەو ناکۆکییە قەرەغولی گیانی لەدەستدا و دیوانی وەقفی سوننیش ڕووداوەکە بە "تیرۆرکردن" ناو دەبات.

ڕاگەیێنراوی فەرمی: دیوانی وەقفی سوننی ڕایگەیاند: ئەو تاوانە قێزەونە شەرمەزار و سەرکۆنە دەکەین و دووپاتی دەکەینەوە کەمتەرخەمی لە پاراستنی ئاسایش و سەلامەتی ئیمامەکان و وتارخوێنانی مزگەوتەکاندا ناکەین.

هۆکارە زانراوەکان: بەگوێرەی شایەتحاڵان، ناکۆکی لە نێوان ئیمامەکە و گرووپەکەدا لەسەر وتاری هەینی دروستبووە، ئەندامانی مەدخەلییەکان مەلاکەیان لە ژوورێکدا کردووە و دەرگەیان لەسەری داخستووە سەرەڕای ئەوەی نەخۆشیی دڵی هەبووە و بەهۆیەوە گیانی لەدەست داوە، دواتر تۆمەتباران دەستگیرکراون و دراونەتە دادگا.

زانیاریی زیاتر: لە مانگی ئایاری ئەمساڵ،  ڕاوێژکارییەتی ئاسایشی نیشتمانیی عێراق بەهۆکاری ئەوەی بیروباوەڕ و چالاکییەکانیان هەڕەشەن بۆسەر ئاشتی کۆمەڵایەتی و ئاسایشی نیشتیمانی بڕیاریدا چالاکییەکانی ڕەوتی "مەدخەلی" قەدەغە بکات و وەک ڕەوتێکی زۆر مەترسیدار بۆسەر ئاشتی کۆمەڵایەتی و ئاسایشی نیشتیمانی لە قەڵەم دا، بەڵام دواتر بەگوێرەی نووسراوێكی نهێنیی دەزگاکە کە دزەی پێكرابوو، لە ناوەڕۆكی نووسراوەكە ئاماژە بەوە كراوە، ڕەوتی سەلەفیی مەدخەلی، لە چوارچێوەی جووڵانەوە و گروپە تووندڕەوەكان دەربهێندرێت.

ئەوەی پێویستە بیزانیت: ڕەوتی مەدخەلییەکان وەک ڕەوتێکی سەر بە سەلەفییەکان لە جیهانی ئیسلامیدا پێناسە دەکرێن، مەدخەلییەکان خۆیان بە شوێنكەوتەی راستەقینەی ئیسلام دەزانن و هەموو بیروباوەڕەکانی دیکە دەخەنە دەرەوەی بازنەی موسڵمانی ڕاستەقینە.