ترەمپ: خەریکە ئارامیم بەرامبەر پووتین لەدەست بدەم

ئاڤا نیوز

بەرامبەر بە بەزاندنی ئاسمانی پۆڵەندا لە لایەن درۆنەکانی ڕووسیا، سەرۆکی ئەمریکا هۆشداری بە ڤلادیمێر پووتین دەدات و ڕایدەگەیەنێت خەریکە ئارامی بەرامبەری لەدەست دەدات، وا بڕوات سزای زۆر تووند دەسەپێنێت.

وێنە گەورەکە: سەرەڕای کۆبوونەوەی لووتکەی نێوان دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا لە ئالاسکا و بە ئەرێنی ناوبردنی کۆبوونەوەکە لە لایەن هەردوو سەرۆکەوە، بەڵام تاوەکو ئێستا هیچ بەرەوپێشچوونێک بە ئاراستەی کۆتایهێنان بە جەنگی ڕووسیا و ئۆکراینا بەدی ناکرێت.

لێدوانی فەرمی: دۆناڵد ترەمپ، سەرۆکی ئەمریکا لە چاوپێکەوتنێکی تەلەفزیۆنیدا لەگەڵ کەناڵی "فۆکس نیوز" ئاماژەی بە پەیوەندییەکانی واشنتن و مۆسکۆ دا و ڕایگەیاند: زۆر نیگەرانم لە هەڵسوکەوتی ڤلادیمێر پووتین و وا هەست دەکەم ئارامیم لەدەست دەدەم، گەڕێکی نوێی سزا پێداچوونەوەی بۆ دەکرێت بۆ سەر نەوت و بانکەکانی ڕووسیا لەگەڵ زیادکردنی باجی گومرگی لەسەر بەرهەمەکانیان.

زانیاریی زیاتر: دۆناڵد ترەمپ لە بەشێکی دیکەی چاوپێکەوتنەکەدا  نیگەرانی خۆی دەربڕی بەرامبەر بە بەزاندنی ئاسمانی پۆڵەندا لە لایەن درۆنەکانی ڕووسیاوە و ڕایگەیاند: پێشێلکردنی سەروەری پۆڵەندا بە هیچ شێوەیەک قبوڵ ناکرێت و هەموو هەوڵێک دەدەم کێشەی پووتین و زیلێنسکی چارەسەر کەم، هەرچەندە ڕقێکی گەورە لە نێوانیاندا هەیە و ئاژاوە و جەنگێکی گەورەیە کە ئەنجامی کارەکانی جۆ بایدنە بۆ منی جێهێشتووە.