ئەحمەد شەرع پێشوازیی لە فەرماندەی فەرماندەیی ناوەندی ئەمریکا دەکات

ئاڤا نیوز

ئەمڕۆ هەینی، ئەحمەد شەرع، سەرۆککۆماری سووریا و لەتیفە درووبی، خانمی یەکەمی سووریا پێشوازییان لە براد کوپەر، فەرماندەی فەرماندەیی ناوەندی ئەمریکا (سێنتکۆم) و سوزان کوپەری هاوسەری، لەگەڵ تۆماس باراک، نێردەی تایبەتی ئەمریکا بۆ سووریا و شاندی یاوەری کرد.

وێنە گەورەکە: دوای ڕۆیشتنی ئەسەد لە دەسەڵات، پەیوەندییەکانی نێوان دەسەڵاتی نوێی سووریا و ئەمریکا گەیشتووەتە قۆناغێکی نوێ، بەجۆرێک دوای یەکتر بینی ترەمپ و ئەحمەد شەرع، بەشێک لەو سزایانەی ئەمریکا لە ڕابردوو سەپاندبوونی بەسەر سووریا هەڵیگرتن.

ڕاگەیێنراوی فەرمی: ماڵپەڕی هەواڵی سووریا کە سەر بە حکومەتە ڕایگەیاند: هەردوولا دووپاتیان کردەوە کە کەشی کۆبوونەوەکە ئەرێنی بوو و ڕەنگدانەوەی خواستێکی هاوبەش بوو بۆ پتەوکردنی هاوبەشی ستراتیژی نێوان دیمەشق و واشنتن و فراوانکردنی کەناڵەکانی گفتوگۆ و پەیوەندیکردن لە ئاستە جیاجیاکاندا، بە شێوەیەک کە خزمەت بە بەرژەوەندی هاوبەش و ئاشتی و گەشەپێدان بکات.

زانیاریی زیاتر: کۆبوونەوەکە لە کۆشکی گەل لە دیمەشق بەڕێوەچوو. بەگوێرەی هەواڵی ڕاگەیاندنی حکومەتی سووری، "هەردوولا ئاسۆی هاوکاری لەبوارەکانی سیاسی و سەربازی و خزمەتکردنی بەرژەوەندییە هاوبەشەکان و چەسپاندنی بناغەکانی ئاسایش و سەقامگیرییان لە سوریا و ناوچەکە تاوتوێ کردووە."

باکگراوند: ڕۆژی 19ـی ئابی ئەمساڵ، ئەحمەد شەرع لە دیمەشق لەگەڵ شاندێکی ئەندامانی ئەنجوومەنی نوێنەران و ئەنجوومەنی پیرانی ئەمریکا بە ئامادەبوونی ئەسعەد شەیبانی، وەزیری دەرەوە و ئەنەس خەتاب، وەزیری ناوخۆ کۆبووەوە.