نەتەوەیەکگرتووەکان بە زۆرینەی دەنگ پشتیوانی لە دامەزراندنی دەوڵەتی سەربەخۆی فەڵەستین ڕادەگەیەنێت

ئاڤا نیوز

نەتەوەیەکگرتووەکان بڕیاری دامەزراندنی دوو دەوڵەتی سەربەخۆ لە نێوان ئیسرائیل و فەڵەستینی خستە دەنگدانەوە و بە زۆرینەی دەنگ پشتیوانی لە بڕیارەکە کرا.

چیرۆکی سەرەکی: ئەمڕۆ هەینی نەتەوەیەکرتووەکان کۆبوونەوەی ئاسایی خۆی کرد، کە تایبەت بوو بە دەنگدان لەسەر بڕیاری دامەزراندنی دوو دەوڵەتی سەربەخۆ لەنێوان ئیسرائیل و فەڵەستین.

بڵاوکراوەی فەرمی: بە پێی بڵاوکراوەی ئەنجامی کۆبوونەوەی ئەمڕۆی نەتەوەیەکگرتووەکان، بە زۆرینەی دەنگ پشتیوانی لە بڕیاری چارەسەری دامەزراندنی دوو دەوڵەتی سەربەخۆ لە نێوان ئیسرائیل و فەڵەستین کراوە، بڕیارەکەش لە لایەن 142 دەوڵەتەوە پشتیوانی لێکراوە، 10 دەوڵەتیش دژی بوون، 12 دەوڵەتیش مافی بێدەنگی و دەنگ نەدانیان بە کارهێناوە.

زانیاریی زیاتر: بڕیارەکەی نەتەوەیەکگرتووەکان بەهەمان شێوە سیاسەتی وێرانکردنی ژێرخانی ئابووری و برسیکردن و گەمارۆدانی غەززەی لە لایەن ئیسرائیلەوە ئیدانە کردووە.

ئەوەی پێویستە بیزانیت: ئەم ڕاگەیێنراوەی نەتەوەیەکگرتووەکان ئەنجامی کۆنگرەی نێودەوڵەتی بوو لە بارەگای نەتەوەیەکگرتووەکان کە هەریەک لە فەرەنسا و سعوودیە ڕێکخەری کۆنگرەکە بوون بۆ دۆزینەوەی ڕێگەچارەیەک بۆ کۆتاییهێنان بە ناکۆکی نێوان ئیسرائیل و فەڵەستین و و پشتیوانیکردن لە چارەسەری دامەزراندنی دوو دەوڵەتی سەربەخۆ، کە لە چوارچێوەی بڕیارەکە دەبێت حەماس دەستبەرداری چەک بێت و بە نێوەندگیری و پشتیوانی نێودەوڵەتی چەک ڕادەستی دەوڵەتی فەڵەستین بکات و ڕۆڵی خۆی کۆتایی پێبێنێت.