سوودانی بەشداری لووتکەی "عەرەبی و ئیسلامی" لە قەتەر دەکات

ئاڤا نیوز

بڕیارە ڕۆژانی یەکشەممە و دووشەممە، محەممەد شیاع سوودانی، سەرۆکوەزیرانی عێراق بەشداری لە لووتکەی بەپەلەی عەرەبی و ئیسلامی لە دەوحەی پایتەختی قەتەر بکات.

چیرۆکی سەرەکی: سێشەممەی ڕابردوو، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحە، سەرەڕای ڕزگاربوونی سەرکردەکانی حەماس، بەڵام کوڕی خەلیل ئەلحەیە، سەرۆکی شاندەکە و چەند کەسێکی دیکە گیانیان لەدەستدا.

زانیاریی بەدەستهاتوو: سوودانی بە یاوەری فوئاد حوسێن، وەزیری دەرەوە بەشداری لە لووتکەکە دەکات کە چەندین سەرۆک و سەرکردەی وڵاتانی ئیسلامی و عەرەبی لەوانەش؛ ئەحمەد شەرع، سەرۆککۆماری سووریا بەشداریی دەکەن.

زانیاریی زیاتر: دوای هێرشەکە، سوودانی پەیوەندییەکی تەلەفۆنی لەگەڵ شێخ تەمیم بن حەمەد ئال سانی، میری قەتەر کرد و سەرکۆنەی حکومەت و گەلی عێراقی بۆ هێرشەکە دەربڕی.