کاردانەوەکان بەرامبەر بڕیارەکەی نەتەوەیەکگرتووەکان دەستیانپێکرد، ئیسرائیل ڕەتیدەکاتەوە

ئاڤا نیوز

هەریەک لە سعوودیە و فەرەنسا پێشوازی لە بڕیاری نەتەوەیەکگرتووەکان دەکەن بۆ دامەزراندنی دوو دەوڵەتی سەربەخۆ بۆ فەڵەستین و ئیسرائیل، وەزارەتی دەرەوەی ئیسرائیلیش بە تووندی ڕەتیدەکاتەوە.

چیرۆکی سەرەکی: ئەمڕۆ هەینی نەتەوەیەکگرتووەکان بڕیاری دامەزراندنی دوو دەوڵەتی سەربەخۆی بۆ ئیسرائیل و فەڵەستین خستە دەنگدانەوە و بە زۆرینەی دەنگ پشتیوانی لە بڕیارەکە کرا، بڕیارەکە لە لایەن 142 دەوڵەتەوە پشتیوانی لێکرا، 10 دەوڵەتی دژی بوون، 12 دەوڵەتیش مافی بێدەنگیان بە کارهێنا.

بڵاوکراوەی فەرمی: ئیمانوێل ماکرۆن، سەرۆکی فەرەنسا لە پلاتفۆرمی ئێکس ڕایگەیاند: بە سەرکردایەتی فەرەنسا و سعوودیە، 142 دەوڵەت پشتیوانییان لە " بەیاننامەی نیویۆرک" کرد بۆ چارەسەری ناکۆکی نێوان ئیسرائیل و فەڵەستین و دامەزراندنی دوو دەوڵەتی سەربەخۆ، پێکەوە ڕێڕەوێک دیاری دەکەین بۆ ئاشتی لە ڕۆژهەڵاتی ناوەڕاست و هیچ گەڕانەوە و پەشیمانییەک لەم بڕیارە بوونی نابێت.

لە لایەکی دیکەوە: حوسێن شێخ، جێگری سەرۆکی فەڵەستین لە ڕاگەیێنراوێکی فەرمیدا ڕایگەیاند: بە بڕیارێکی مێژوویی کۆمەڵگەی نێودەوڵەتی، هەنگاوێکی گرنگ بە ئاراستەی کۆتاییهێنان بە داگیرکارییەکانی ئیسرائیل نرا، داننان بە دەوڵەتی سەربەخۆی فەڵەستین وێنایەکی گەورە بوو بۆ پشتیوانیکردن لە مافی گەلی فەڵەستین لە دیاریکردنی چارەنووسی خۆی، ئەم بڕیارە دەبێتە هۆی ئاشتی و سەقامگیری ڕۆژهەڵاتی ناوەڕاست.

بۆچوونی لایەنی بەرامبەر: وەزارەتی دەرەوەی ئیسرائیل لە ڕاگەیێنراوێکی فەرمیدا بڕیارەکەی نەتەوەیەکگرتووەکانی ڕەتکردەوە و ڕایگەیاند، ئیسرائیل زۆر بە تووندی بڕیارەکە ڕەتدەکاتەوە و بە هەموو شێوەیەک دژی دەبێت و بڕیارەکەی بە بڕیارێکی سیاسی و دژ بە ولاتەکەی ناو برد.