کارەبای 24 کاتژمێری دەگەیێنرێتە چوار ناحیەی ئیدارەی سەربەخۆی سۆران

ئاڤا نیوز

پرۆژەی ڕووناکی دەگەیێنرێتە سنووری چوار ناحیەی ئیدارەی سەربەخۆی سۆران و تیمە تەکنیکییەکانیش ئێستا سەرقاڵی گەیاندنی خزمەتگوزاریی کارەبای 24 کاتژمێرین بەو ناوچانە.

وێنە گەورەکە: پرۆژەی ڕووناکی یەکێکە لە پرۆژە ستراتیژییەکانی حکومەتی هەرێمی کوردستان، ئامانج لەم پڕۆژەیە دابینکردنی کارەبای 24 کاتژمێری بەردەوامە بۆ هەموو ناوچەکانی کوردستان، بڕیارە تاوەکو کۆتایی ساڵی 2026 کارەکانی بەکۆتایی بێت و هەموو هاونیشتمانیان لەم خزمەتگوزارییە سوودمەندبن.

لێدوانی فەرمی: ئەردەوان ئیبراهیم، بەرێوەبەری گشتیی کارەبای سۆران بە ئاڤا میدیای گوت، لە سنووری ناحیەکانی گەڵاڵە، قەسرێ، وەرتێ، سمیلان و گوندەکانی سەر بەو چوار ناحیەیە تیمە تەکنیکییەکانی پرۆژەی ڕووناکی دەستییان بەکارکردن کردووە، ڕۆژانەش لە کاتی کارکردنی تیمەکان کارەبای فیدەرەکانی ژمارە (یەک، دوو، سێ، پێنج، شەش)ی ئەو سنوورە دەکوژێنرێنەوە.

 

زانیاریی زیاتر: لە سنووری ئیدارەی سەربەخۆی سۆران، کارە تەکنیکییەکانی پرۆژەی ڕووناکی لە سەنتەری سۆران و دیانا، قەزای خەلیفان، قەزای ڕواندز تەواو بووە، لە قەزای چۆمان دەستییان بەکارکردن کردووە، دوای تەواوبوونی قەزای چۆمانیش لە قەزای مێرگەسۆر دەست بەکارکردن دەکەن.

 

بۆچی گرنگە: بەتەواوبوونی کارە تەکنیکییەکان، هاونیشتمانیانی ئەو سنوورەش سوودمەند دەبن لە خزمەتگوزاریی کارەبای 24 کاتژمێری و مۆلیدەکانی ئەو سنوورە کە ژمارەیان زیاتر لە 100 مۆلیدەیە دەکوژێنرێنەوە.

 

ئەوەی پێویستە بیزانیت: لە پڕۆژەی ڕووناکی 80% هاونیشتمانیان پارەیەکی کەمتر دەدەن بە کارەبا بەراورد بەو پارەیەی دەیاندا بە هەردوو کارەبای نیشتمانی و مۆلیدە.

 

ئەمەش بزانە: بەپێی دوایین ئامار تا ئێستا 115 هەزار شوێنی بازرگانی و نزیکەی چوار ملیۆن هاونیشتمانی پرۆژەی ڕووناکییان پێگەیشتووە و سوودمەند بوون لە کارەبای 24 کاتژمێری، بەهۆیەوە سێ هەزار و 222 مۆلیدە کوژانەتەوە کە تێکڕای کوژانەوەیان دەبێتە هۆی کەم کردنەوەی 600 هەزار تۆن لە دەردانی گازی دوانە ئۆکسیدی کاربۆن.