هێزەکانی ئەمریکا لە ناوچەی سەوزی بەغدا درۆنێک دەخەنە خوارەوە

ئاڤا نیوز

سیستمی بەرگریی ئاسمانیی باڵیۆزخانەی ئەمریکا لە بەغدا درۆنێک لە ناوچەی سەوزی بەغدا دەخاتە خوارەوە، فەرماندەیی ئۆپەراسیۆنەکانی بەغداش لەوبارەیەوە ڕوونکردنەوە دەدات.

ڕاگەیێنراوی فەرمی: فەرماندەیی ئۆپەراسیۆنەکانی بەغدا لە ڕوونکردنەوەیەکەدا ئاماژە بۆ ئەوە دەکات، ئەو فڕۆکە بێفڕۆکەوانەی لە دەوروبەری ناوچەی سەوز کەوتووەتە خوارەوە، بریتییە لە (درۆن)ـێک کە تەنیا بۆ مەبەستی وێنەگرتن تەرخان کراوە.

لەهەمان کاتدا: فەرماندەییەکە داوا لە سەرجەم دەزگاکانی ڕاگەیاندن دەکات کە وردبین بن لە گواستنەوەی زانیارییەکان و دوورکەوتنەوە لە دەنگۆکان.

ئەوەی لەبارەیەوە دەگوترێت: پێشتر سەرچاوەکی ئەمنی کە قسەی بۆ میدیا عێراقییەکان کردبوو ڕایگەیاند، "فڕۆکەکە هیچ ماددەیەکی تەقەمەنی هەڵنەگرتبوو و دوای کاراکردنی سیستمی بەرگریی ئاسمانی باڵیۆزخانەی ئەمریکا، لەسەر بینای دادگای فیدراڵی خرایە خوارەوە".