مۆساد داوایەکی نەتانیاهۆی بۆ کوشتنی سەرکردەکانی حەماس ڕەتکردووەتەوە

ئاڤا نیوز

دەزگای هەواڵگریی ئیسرائیل دژایەتی خۆی بۆ کوشتنی سەرکردەکانی حەماس لە قەتەر دەربڕیووە و داوای نەتانیاهۆی بۆ ئۆپەراسیۆن لە نێو قەتەر ڕەتکردووەتەوە.

چیرۆکی سەرەکی: ڕۆژی سێشەممە، ئیسرائیل هێرشێکی ئاسمانی لەناکاوی کردە سەر سەرکردەکانی حەماس و شاندی دانوسانکار لە دەوحە، سەرەڕای کوشتنی پێنج ئەندام، بەڵام شکستی هێنا لە کوشتنی سەرکردەکانی حەماس.

بڵاوکراوەی فەرمی: بە پێی ڕاپۆرتێکی واشنتن پۆست، بنیامین ناتانیاهۆ، سەرۆکوەزیرانی ئیسرائیل پێش ئەوەی هێرشی ئاسمانی بکاتە سەر سەرکردەکانی حەماس لە قەتەر، داوای لە دەزگای هەواڵگری وڵاتەکەی کردووە ئۆپەراسیۆنێکی نهێنی و مەترسیدار ئەنجام بدەن و سنووری قەتەر ببەزێنن و لە نێو دەوحە سەرکردەکانی حەماس بکوژن، بەڵام دەیڤد بارنیا، سەرۆکی مۆساد  دژایەتی خۆی بۆ کوشتنی سەرکردەکانی حەماس دەربڕیووە و ڕایگەیاندووە، کوشتنی سەرکردەکانی حەماس لە قەتەر دەبێتە هۆی پچڕانی پەیوەندی و تێکدانی پلانی دەزگاکەی لە قەتەر، کە تەنیا ڕێگەی بەردەوامی دانوستانە لە نێوان حەماس و ئیسرائیل.

زانیاریی زیاتر: لە مشتوومڕی تووندی نێوان نەتانیاهۆ و بارنیا، سەرۆکی مۆساد داواکەی نەتانیاهۆی دژ بە پلانی دۆناڵد ترەمپ، سەرۆکی ئەمریکا زانیووە بۆ ئازادکردنی بارمتەکان و ڕاگەیاندنی ئاگربەست، لە بەرامبەردا ڕەتیکردووەتەوە مۆساد بەشدار بێت لە ئۆپەراسیۆنێکی لەو شێوەیەدا، دوای ڕەتکردنەوەی داوای لە لایەن دەزگای هەواڵگرییەوە نەتانیاهۆ فەرمانی بە هێزی ئاسمانی کردووە بۆ جێبەجێکردنی پلانەکە و 15 فڕۆکەی جەنگی ئامادە کراون و بەشداربوون لە هێرشەکەی ئیسرائیل بۆ سەر قەتەر.