ئەنجوومەنی دەوڵەت یەکەم کۆبوونەوەی ڕاوێژکاری خۆی لەبارەی داهاتی ناوخۆی کوردستان کرد

ئاڤا نیوز

پێشنیوەڕۆی ئەمڕۆ، ئەنجوومەنی دەوڵەت یەکەم کۆبوونەوەی ڕاوێژکاری خۆی لەبارەی یەکلاییکردنەوەی پرسی داهاتی نانەوتی هەرێمی کوردستان ئەنجامدا و بڕیارە ڕۆژی سێشەممە بە ئامادەبوونی دوو نوێنەری حکومەتی کوردستان کۆبوونەوەکەیەکی فراوان بکرێت.

باکگراوند: دوای چەندین مانگ لە دانیشتنی شاندی نێوان وەزارەتی دارایی هەرێمی کوردستان و عێراق لەبارەی داهاتی نانەوتی، سەرەنجام هەفتەی پێشوو لە کۆبوونەوەی ئەنجوومەنی وەزیران بۆچوونی هەردوو شاندی هەرێمی کوردستان و عێراق لە پێنج پرسیاردا بۆ ئەنجوومەنی دەوڵەت نێردرا بۆئەوەی بۆچوونی خۆیان لەو بارەیەوە دەرببڕن.

زانیاریی بەدەستهاتوو: ئەندامێکی ئەنجوومەنی دەوڵەت قسەی بۆ ئاڤا کردووە دەڵێت: پێش نیوەڕۆی ئەمڕۆ کۆبوونەوەیەکی (مداوەلە) ڕاوێژکاری لەنێوان بەشێک لە ئەندامانی ئەنجوومەنی دەوڵەت کراوە، گەیشتوون بەو بڕیارەی پێویستە ڕۆژی سێشەممەی ئەم هەفتەیە کۆبوونەوەیەکی ئەنجوومەنی دەوڵەت بکرێت، بەڵام دەبێ دوو نوێنەری حکومەتی کوردستان لە کۆبوونەوەکە ئامادەبن، یەکێکیان یاسایی و ئەوەی دیکەیان ژمێریاری بێ.

زانیاریی زیاتر: کۆبوونەوەکەی ئەنجوومەنی دەوڵەت لە کاتژمێر 9:00ـی بەیانی ڕۆژی سێشەممە دەکرێت، ئەندامی ئەنجوومەنەکە وتی، هەوڵ دەدەین بەوە ڕابگەین بۆچوونی ئەنجوومەنەکە بۆ کۆبوونەوەی ئەنجوومەنی وەزیرانی عێراق بنێردرێت، ئەگەر نەتوانرا ئەوا دەکەوێتە ڕۆژانی دواتر.