ئێران: لە شەش مانگی یەکەمی ئەمساڵ سەرکەوتنی بەرچاومان بەسەر قاچاخچییەتی ماددەی هۆشبەر بەدەستهێناوە

ئاڤا نیوز

فەرماندەی پاسەوانی سنوور لە ئێران ڕایگەیاند، کە پاسەوانانی سنوور لە ماوەی شەش مانگی یەکەمی ئەمساڵدا سەرکەوتنی بەرچاویان بەدەستهێناوە لە ڕووبەڕووبوونەوەی قاچاخچییەکان و بازرگانانی ماددە هۆشبەرەکان لە سنوورەکانی ئێران.

وێنە گەورەکە: ئێران بووەتە گۆڕەپانی بازرگانیکردن بە ماددەی هۆشبەر و کارتێکەرە دەروونییەکان و چەندین تۆڕی ناوخۆیی و نێودەوڵەتی تێیدا کار دەکەن.

لێدوانی فەرمی: فەریق ئەحمەد عەلی، فەرماندەی پاسەوانی سنووری، ڕایگەیاند، لەم ماوەیەدا 11 تۆن و 859 کیلۆگرام ماددەی هۆشبەری جۆراوجۆر، لەوانە تلیاک، کریستاڵ میت، هێرۆین و حەشیش دەستی بەسەرداگیراوە. هەروەها، 253 کەس کە تێوەگلا بوون لە بازرگانیکردنی ماددە هۆشبەرەکان دەستگیرکراون و 11 قاچاخچیش کوژراون.

ئەمەش بزانە: بە وتەی فەرماندەی پاسەوانی سنوور، زۆربەی ئەم دەستبەسەرداگرتنانە لە سنوورەکانی باشووری ڕۆژهەڵاتی وڵات و بەتایبەت لە پارێزگای سیستان و بەلووچستان ئەنجامدراون. ناوبراو ستایشی هەوڵەکانی پاسەوانانی سنووری کرد و جەختی لەسەر بەردەوامیدان بە کارەکانیان بۆ ڕووبەڕووبوونەوەی ئەم دیاردە وێرانکەرە کردەوە.

بەتەنیشت ئەم بابەتەوە: ئەم هەفتەیە هەردوو حکومەتی ئێران و حکومەتی عێراق بۆ ڕووبەڕووبوونەوەی ماددەی هۆشبەر گرێبەستێکیان واژۆکرد بۆئەوەی سنوورەکانی نێوانیان توندوتۆڵتر بکەن.