کۆبوونەوەی ئامادەکاریی لووتکەی عەرەبی - ئیسلامی لە دەوحە بەڕێوەچوو

ئاڤا نیوز

کارەکانی کۆبوونەوەی ئامادەکاریی لووتکەی نائاسایی عەرەبی - ئیسلامی لەسەر ئاستی وەزیرانی دەرەوە لە دەوحە بەڕێوەچوو، ئەمەش دوابەدوای هێرشی ئیسرائیل بۆ سەر قەتەر.

چیرۆکی سەرەکی: دەوحەی پایتەختی قەتەر، ڕۆژانی یەکشەممە و دووشەممە 14 و 15ـی ئەیلوول، میوانداری لووتکەیەکی نائاسایی عەرەبی - ئیسلامی دەکات، بۆ تاوتوێکردنی لێکەوتەکانی هێرشی ئیسرائیل بۆ سەر قەتەر. ئەمڕۆش بە سەرۆکایەتی شێخ محەمەد بن عەبدولڕەحمان بن جاسم ئال سانی، سەرۆکوەزیران و وەزیری دەرەوەی قەتەر، کۆبوونەوەی ئامادەکاری بە بەشداری وەزیرانی دەرەوەی وڵاتانی ئەندام لە کۆمکاری وڵاتانی عەرەبی و ڕێکخراوی هاوکاری ئیسلامی بەڕێوەچوو.

لێدوانی فەرمی: ماجد بن محەممەد ئەنساری، وتەبێژی وەزارەتی دەرەوەی قەتەر ڕایگەیاند، بەستنی لووتکەکە گوزارشتە لە پشتیوانییەکی بەرفراوانی عەرەبی و ئیسلامی بۆ دەوحە، جەخت لەسەر ڕەتکردنەوەی تەواوەتی ئەم وڵاتانە دەکاتەوە بۆ تیرۆری دەوڵەتی کە ئیسرائیل ئەنجامی دەدات.

لەهەمان کاتدا: وتەبێژەکە وتی، ئەم لووتکە نائاساییە پڕۆژەبڕیارێک سەبارەت بە هێرشی ئیسرائیل بۆ سەر دەوڵەتی قەتەر تاوتوێ دەکات، کە لە کۆبوونەوەی ئامادەکاریی وەزیرانی دەرەوەی وڵاتانی عەرەبی و ئیسلامی، پێشکەش کرا".

ئەوەی پێویستە بیزانیت: سەبارەت بەو سەرکردانەی بەشدارن لە لووتکەکە، هەریەک لە عێراق و ئێران بەشداری محەممەد شیاع سوودانی، سەرۆکوەزیران و مەسعود پزیشکیانیان پشتڕاست کردەوە، سەرۆکایەتیی کۆماری تورکیاش ڕایگەیاند، ڕەجەب تەیب ئەردۆغان ڕۆژی دووشەممە سەردانی دەوحە دەکات، بێ ئەوەی وردەکاری زیاتر بخاتەڕوو.

باکگراوند: ڕۆژی سێشەممەی هەفتەی ڕابردوو 2025-9-9، ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، لە هێرشەکاندا کۆبوونەوەیەکی سەرکردایەتیی حەماسیش کرایە ئامانج و بەهۆیەوە ژمارەیەک لە ئەندامانی بزووتنەوەکە کوژران و برینداربوون.