لە کەرکووک بەڕێوەبەرێک و سێ فەرمانبەر بەهۆی گەندەڵی زیندانی دەکرێن

ئاڤا نیوز

دادگای کەرکووک بە تۆمەتی گەندەڵی و دزی سزای زیندانیکردنی بەسەر چوار کەس لە فەرمانگەی کارەبا و کۆمپانیای نەوتی باکوور سەپاند، کە یەکێکیان برای فەرماندەیەکی حەشدی شەعبییە.

چیرۆکی سەرەکی: دادگای کەرکووک ئەمڕۆ سزای زیندانیکردنی بەسەر دوو فەرمانبەر و بەرپرسێکی فەرمانگەی کارەبای کەرکووکدا سەپاند بە تۆمەتی گەندەڵی، هەروەها فەرمانبەرێکی کۆمپانیای نەوتی باکووریش بە هەمان تۆمەت سزا درا.

زانیاریی بەدەستهاتوو: دادوەرێکی دەستەی دەستپاکی کەرکووک سزای شەش مانگ زیندانیکردنی بۆ ئەو سێ کەسە لە فەرمانگەی کارەبا دەرکردووە. گەندەڵییەکە بریتی بووە لە گرانکردنی نرخی کەلوپەل و پڕۆژەکان. بەگوێرەی زانیارییەکان، ئەم فەرمانبەرانە کاتێک ستوونێکی کارەبایان بە 10 هەزار دینار کڕیوە، وەسڵیان بە 20 هەزار دینار بردووەتەوە فەرمانگە و 10 هەزار دیناریان خستۆتە گیرفانی خۆیانەوە.

هەروەها لە پڕۆژەیەکدا کە بڕێکی زۆر پارەی بۆ تەرخانکرابوو، تەنها نیوەی پارەکەیان بۆ پڕۆژەکە خەرج کردووە و نیوەکەی تریشیان دزیوە. ئاشکرا بووە کە بەرپرسەکەی کارەبا کە تێوەگڵا بووە، برای فەرماندەیەکی حەشدی شەعبییە.

لەلایەکی دیکەوە: فەرمانبەرێکی کۆمپانیای نەوتی باکووریش بە تۆمەتی دزی و گەندەڵی سزای شەش مانگ زیندانیکردنی بەسەردا سەپێندرا.