ئاسایشی سلێمانی قاچاخچییەك و 23 كۆچبەری نایاسایی دەستگیر دەكات

ئاڤا نیوز

دەزگای ئاسایشی سلێمانی، بازرگانێكی كۆچبەرانی نایاسایی و 23 كەسی بەڕەگەز سووری دەستگیر دەكات كە بە قاچاغ هاتبوونە هەرێمی كوردستان.

چیرۆكی سەرەكی: شەوی 11ـی ئەیلوولی 2025، تیمەكانی سەر بە دەزگای ئاسایشی سلێمانی، دوای بەدواداچوونی ورد و كۆكردنەوەی زانیاریی پێویست، توانییان بازرگانێكی بەقاچاخبردنی كۆچبەران و 19 كۆچبەری پیاو و چوار كۆچبەری ئافرەت دەستگیر بكەن كە سەرجەمیان سوورین و بە قاچاخ هاتبوونە هەرێمی كوردستان.

لێدوانی فەرمی: عەقید سەلام عەبدولخالق، وتەبێژی دەزگای ئاسایشی سلێمانی ڕایگەیاند، ''قاچاخچییە دەستگیركراوەکە ناوی (ئ. ی. ع)ـە و خەڵکی هەرێمی کوردستانە، کۆچبەرە نایاساییەكانیش سەرجەمیان خەڵكی سووریان."

بە تەنیشت ئەم بابەتەوە: لە ماوەی ڕۆژانی ڕابردوودا، دەزگای ئاسایشی هەرێمی كوردستان-سلێمانی، دەستگیركردنی باندێكی حەوت كەسی ڕاگەیاند كە بازرگانی هێنانی كۆچبەرانی نایاسایین و لەكاتی هێنانی 14 كۆچبەری سووری بۆ هەرێمی كوردستان، بە پێی ماددەی 39 لە یاسای نشینگە دەستگیر كراون.