لووتکەی نائاسایی عەرەبی - ئیسلامی سەبارەت هێرشەکانی ئیسرائیل بۆ سەر قەتەر بەڕێوەدەچێت

ئاڤا نیوز

ئەمڕۆ لە شاری دەوحەی پایتەختی قەتەر، لووتکەیەکی نائاسایی عەرەبی - ئیسلامی بەڕێوەدەچێت بۆ تاوتوێکردنی دەرهاوێشتەکانی دەستدرێژییەکانی هەفتەی ڕابردووی ئیسرائیل بۆ سەر قەتەر،  پێشبینی دەکرێت بڕیاری یەکلاکەرەوە لەم لووتکەیەدا دەربچن.

چیرۆکی سەرەکی: دەوحەی پایتەختی قەتەر، ڕۆژانی یەکشەممە و دووشەممە 14 و 15ـی ئەیلوول، میوانداری لووتکەیەکی نائاسایی عەرەبی - ئیسلامی دەکات، بۆ تاوتوێکردنی لێکەوتەکانی هێرشی ئیسرائیل بۆ سەر قەتەر. پێش لووتکەی ئەمڕۆ، دوێنێ یەکشەممە بە سەرۆکایەتی شێخ محەمەد بن عەبدولڕەحمان بن جاسم ئال سانی، سەرۆکوەزیران و وەزیری دەرەوەی قەتەر، کۆبوونەوەی ئامادەکاری بە بەشداری وەزیرانی دەرەوەی وڵاتانی ئەندام لە کۆمکاری وڵاتانی عەرەبی و ڕێکخراوی هاوکاری ئیسلامی بەڕێوەچوو.

لێدوانی فەرمی: ماجد ئەنساری، وتەبێژی وەزارەتی دەرەوەی قەتەر، ڕایگەیاند: لووتکەی نائاسایی کە ئەمڕۆ دووشەممە بەڕێوەدەچێت، پڕۆژە بڕیارێک سەبارەت بە هێرشی ئیسرائیل تاوتوێ دەکات، کە پێشتر لە کۆبوونەوەی ئامادەکاری بۆ لووتکەکە دوێنێ یەکشەممە لەلایەن وەزیرانی دەرەوەوە ئەنجامدرا.

ئەنساری ئاماژەی بەوەشدا "بەڕێوەچوونی لووتکەی عەرەبی - ئیسلامی لەم کاتەدا چەندین واتای هەیە و یەکگرتوویی بەرفراوانی عەرەبی و ئیسلامی لەگەڵ دەوڵەتی قەتەردا نیشان دەدات لە ڕووبەڕووبوونەوەی هێرشەکانی ئیسرائیل."

ئەوەی پێشبینی دەکرێت: پێشبینی دەکرێت بڕیاری یەکلاکەرەوە لەم لووتکەیەدا دەربچن، کە ڕەنگە بگاتە ئاستی سڕکردنی پەیوەندییەکان لەگەڵ ئیسرائیل، بە تایبەتی لەسەر ئاستی ئابووری، تا کۆتاییهاتنی هێرشەکان بۆ سەر غەززە.

لەلایەکی دیکەوە: چەندین بژاردە خراونەتە بەردەم لووتکەکە، لەوانە: ئیدانەکردنی ڕوونی دەستدرێژییەکانی ئیسرائیل بۆ سەر قەتەر وەک پێشینەیەکی مەترسیدار کە کاریگەری لەسەر سەروەری وڵاتانی عەرەبی و ئیسلامی دەبێت. هەوڵی دیپلۆماسیی هاوئاهەنگ لە ئەنجوومەنی ئاسایش، نەتەوەیەکگرتووەکان و ڕێکخراوە ئیسلامی و نێودەوڵەتییەکان بۆ گوشار خستنە سەر ئیسرائیل و خستنە ئەستۆی بەرپرسیارێتی پەرەسەندنەکان. هەروەها ڕێوشوێنی ئابووری و میدیایی کە ڕەنگە بگاتە بایکۆتکردن.

ئەوەی لەبارەیەوە دەگوترێت: چاودێرانیش پێیان وایە ئەم لووتکەیە تاقیکردنەوەیەکی جددی دەبێت بۆ توانای سیستمی عەرەبی و ئیسلامی لە گواستنەوە لە ئاستی ئیدانەکردنەوە بۆ ئاستی کردار، بە تایبەتی لەبەر ڕۆشنایی قەبارەی هەڕەشە ئەمنی و سیاسییەکان.