پەرلەمانی عێراق دەنگ لەسەر حەوت پرۆژە یاسا دەدات

ئاڤا نیوز

دوانی نزیکەی 20 ڕۆژ لە دوایەمین دانیشتنی پەرلەمان، ئەمڕۆ جارێکی دیکە پەرلەمانی عێراق کۆدەبێتەوە بۆ دەنگدان بە ژمارەیەک پرۆژە یاسا و خوێندنەوە بۆ ژمارەیەک پرۆژە یاسای دیکە.

وێنە گەورەکە: کەمتر لە دوو مانگ ماوە بۆ هەڵبژاردنی خولی نوێی پەرلەمانی عێراق، بۆیە ئەم خولەی پەرلەمان دانیشتنەکان بە سستی بەڕێوەدەبات و کۆتا دانیشتنی 27ـی ئاب بوو، واتە لە 19 ڕۆژی ڕابردوودا کرا بوو، پێویست بوو لەو ماوەیە لانیکەم چوار کۆبوونەوە بکات، بەڵام هیچ کۆبوونەوەیەکی نەکردووە.

ئەوەی چاوەڕوان دەکرێت: بڕیارە ئەمڕۆ دووشەممە، پەرلەمان دانیشتنی ئاسایی خۆی بکات بۆ گفتوگۆکردن و دەنگدان لەسەر حەوت پرۆژە یاسا، لەوانەش: یاسای وەبەرهێنانی پیشەسازی، یاسای وزەی نوێبووەوە و دەستەی چاودێریی ناوەکی، هەروەها هەمواری یاسای بەرگریی شارستانی، جگە لە گفتوگۆکردن لەسەر یاسای چاودێریکردنی تەرخانکردنی داهاتەکانی حکومەتی فیدراڵی.

ڕاگەیێنراوی فەرمی: بەگوێرەی ڕاگەیێنراوی فەرمانگەی ڕاگەیاندنی ئەنجوومەنی نوێنەران، خشتەی کارەکانی کۆبوونەوەی ئەمڕۆ دووشەممە بریتیییە لە:

دەنگدان لەسەر پڕۆژەیاسای هەمواری سێیەمی یاسای قەرەبووکردنەوەی زیانلێکەوتووان ئەوانەی بەشێک لە جەستەیان لەدەستداوە.

دەنگدان لەسەر پڕۆژەیاسای هەمواری یەکەمی یاسای دەستەی نیشتمانیی چاودێریی ناوەکی و تیشکی و کیمیایی و بایۆلۆجی.

دەنگدان لەسەر پڕۆژەیاسای ڕێکخستنی وزەی نوێبووەوە.

دەنگدان لەسەر پڕۆژەیاسای تەندروستیی دەروونی.

دەنگدان لەسەر پڕۆژەیاسای پەسەندکردنی ڕێککەوتننامەی هاندانی و پاراستنی هاوبەشی وەبەرهێنان لەنێوان عێراق و سعودیە.

دەنگدان لەسەر پڕۆژەیاسای هەموارکردنی چوارەمی یاسای وەبەرهێنانی پیشەسازی بۆ هەردوو کەرتی تایبەت و تێکەڵاو.

دەنگدان لەسەر پڕۆژەیاسای هەموارکردنی یەکەمی یاسای بەرگریی شارستانی.

لەلایەکی دیکەوە: هەر بەگوێرەی کارنامەی دانیشتنەکە، خوێندنەوەی یەکەم بۆ چەند یاسایەک و هەروەها "خوێندنەوەی دووەم" بۆ پڕۆژەیاسای هەموارکردنی یەکەمی یاسای دەستەی گشتیی چاودێریی تەرخانکردنی داهاتەکانی حکومەتی فیدراڵی ژمارە 55ی ساڵی 2017، دەکرێت، جگە لە گفتوگۆکردنی "خوێندنەوەی دووەم" بۆ پڕۆژەیاسای کۆلێژی فڕۆکەوانیی سوپا.