مەسعود ساڵەیی: ئاڤا لە ڕێگەی بەرنامەکانی سەکۆی پێکەوەژیانی ئاشتیانەیە

ئاڤا نیوز

مەسعود ساڵەیی، بەرپرسی ئەنجوومەنی باڵای تێکۆشەرانی پارتی دیموکراتی کوردستان پەیامێکی پیرۆزبایی ئاراستەی دامەزراوەی میدیای ئاڤا کردووە و تیایدا هاتووە، ئاڤا لە ڕێگەی هەواڵ و ڕیپۆرتاژ و بەرنامە هونەری و کولتووری و کۆمەڵایەتییەکانیەوە سەکۆی پێکەوەژیانی ئاشتی و ئارامییە لەنێوان پێکهاتە جیاوازەکانی کوردستان.

دەقی پەیامی بەرپرسی ئەنجوومەنی باڵای تێکۆشەرانی پارتی دیموکراتی کوردستان بۆ ساڵیادی دامەزراندی ئاڤا میدیا:-

بەبۆنەی ساڵیادی دامەزراندنی کەناڵی ئاڤا میدیا، جوانترین پیرۆزبایی خۆم پێشکەش بە بەڕێوەبەرایەتیی و ڕاگەیاندنکاران و سەرجەم کارمەندانی ئاڤا دەکەم، هیوای درەوشانەوە و سەرکەوتنی زیاترتان بۆ دەخوازم. 


کەناڵەکەتان دامەزراوەیەکی جۆری ڕاگەیاندنە، لە ماوەی یەک ساڵدا ئامادەبوونی دیار و بەرچاوی خۆی سەلماندووە، ئەمەش لە ڕێگەی پێشکەشکردنی ئەو بەرنامە سەرنجڕاکێشانەی کە لەگەڵ سەلیقە و ئارەزووی بینەرانی کوردەواری و کوردستان گونجاوە، هاوکات لەگەڵ پێویستییەکانی سەردەمدا ڕێکن و ڕاستگۆ و ڕاشکاوانە دەربڕی خەم و ئاواتەکانیانن. 


ئاڤا لە ڕێگەی خزمەتکردنی کێشە ڕەواکانی گەلەکەماندا و لە ڕێگەی هەواڵ و ڕیپۆرتاژ و بەرنامە هونەری و کولتووری و کۆمەڵایەتییەکانیەوە سەکۆی پێکەوەژیانی ئاشتی و ئارامییە لەنێوان پێکهاتە جیاوازەکانی کوردستان.


دڵنیام کەناڵی ئاڤا لە کاروانی ڕاگەیاندا بە ڕاستگۆیی و کاری پیشەییانەی زیاتر بەرەو پێش هەنگاو دەنێت و دەشتوانێت ببێتە پردێکی بەردەوامی دەنگ و ڕەنگی جوانی ڕاستییەکان و سەرچاوی باشی بڵاوبوونەوەی ڕۆشنبیری و هۆشیاری و ڕێز لە یەکتریگرتن. 



مەسعود ساڵەیی، بەرپرسی ئەنجوومەنی باڵای تێکۆشەرانی پارتی دیموکراتی کوردستان