قۆناغی دووەمی کۆڕنیشی زاخۆ تەواو دەبێت و بەم نزیکانە دەکرێتەوە

ئاڤا نیوز

ڕووبەری گەشتیاری لە ئیدارەی سەربەخۆی زاخۆ فراوان دەبێت، قۆناغی دووەمی کۆڕنیش بەم نزیکانە تەواو دەبێت و  لەڕێوڕەسمێکدا دەکرێتەوە.

وێنە گەورەکە: لە درێژەی گەشەپێدانی پرۆژە گەشتیارییەکانی هەرێمی کوردستان، قۆناغی دووەمی پرۆژەی کۆڕنیشی زاخۆ بە گوژمەی شەش ملیار دینار تەواو دەبێت، لەم قۆناغەدا درێژییەکەی سێ کیلۆمەترە.

لێدوانی فەرمی: چیا ئەمین، بەڕێوەبەری گشتیی گەشتوگوزاری ئیدارەی سەربەخۆی زاخۆ؛ بە ئاڤای گوت، "90٪ ـی پڕۆژەکە تەواو بووە، کۆتایی ئەم مانگە بەشی یەکەمی پڕۆژەی کۆڕنیشی زاخۆ دەکرێتەوە، تاوەکو کۆتایی مانگی 10 بەتەواوەتی ئامادە دەبێت و بەڕووی گەشتیاراندا دەکرێتەوە."

زانیاریی زیاتر: لەم قۆناغەدا زیاتر لە 50% ـی پڕۆژەکە سەوزایی لەخۆ دەگرێت، پیادەی هاتوچۆ بە درێژایی هەشت مەتر بۆ هەر لایەک دروست کراوە، خواردنگە، کافتریا و بەلەمی گەشتیاری لە پرۆژەکەدا هەن؛ بە تەواوبوونی پرۆژەکەش ژمارەی گەشتیاران بۆ زاخۆ زیاتر دەبێت.