سوودانی، پزیشکیان، ئەردۆغان و بن سەلمان: پشتیوانی لە ئارامی ناوچەکە دەکەین

ئاڤا نیوز

سەرۆکوەزیرانی عێراق لەگەڵ سەرۆکی ئێران و تورکیا و شازادەی جێنشینی سعودییە کۆبووەوە و هەر چوار سەرکردەکە ڕایانگەیاند، پشتیوانی لە ئارامی ناوچەکە دەکەن و پێویستە سەروەریی و یەکێتی خاکی وڵاتانی ناوچەکە پارێزراوبێت.

وێنە گەورەکە: ئەمڕۆ لە دەوحەی پایتەختی قەتەر، سەرۆک و سەرکردەی 57 دەوڵەتی عەرەبی و ئیسلامی کۆبوونەوە و گفتوگۆیان لەسەر هێرشەکەی سێشەممەی ڕابردووی ئیسرائیل بۆسەر قەتەر کرد، لە کۆبوونەوەکەدا داواکرا لە ئاستی نێودەوڵەتی هێرشەکەی ئیسرائیل سەرکۆنە بکرێت و لێپرسینەوە لەگەڵ ئەو وڵاتە بکرێت، هاوکات داواشکرا ڕێکار بۆ ڕێگریی لە دووبارەبوونەوەی ئەو هێرش بگیرێتەبەر.

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران لە سێ دیداری جیاوازدا لەگەڵ هەریەکە لە مەسعوود پزیشکیان سەرۆککۆماری ئێران، ڕەجەب تەیب ئەردۆغان سەرۆککۆماری تورکیا و محەممەد بن سەلمان شازادەی جێنشینی سعودییە کۆبووەوە.

ئاماژەی بەوەشکردووە، لەکۆبوونەوەکاندا جەخت لە پاراستنی ئارامی ناوچەکە و سەروەریی و یەکێتی خاکی وڵاتانی ناوچەکە کرایەوە، هاوکات جەختیش لە زیاتر پەرەپێدانی پەیوەندییە دوو قۆڵییەکان کرایەوە ئەویش بە ئامانجی زیاتر گەشەپێدانی لایەنی ئابووری و گەشەپێدان لەسەرجەم بوارەکان، بۆ بەدیهێنانی ڕوانگە هاوبەشەکان لە داهاتوودا بۆ خزمەتی گەلانی ناوچەکە.