سێ ساڵ بەسەر مەرگی "ژینا ئەمینی" تێپەڕ دەبێ

ئاڤا نیوز

ڕۆژی 16ـی ئەیلول، یادی سێ ساڵەی مردنی ژینا ئەمینییە، ئەو کچە کوردەی شاری سەقزی ڕۆژهەڵاتی کوردستان کە لە وێستگەیەکی میترۆی تاران لەلایەن پۆلیسی ڕەوشتی تاران دەستبەسەر کرا، دواتر لە نەخۆشخانە گیانی لەدەستدا.

چیرۆکی سەرەکی: ڕۆژی 13-9-2022 لە کاتێکدا "مەهسا ئەمینی" ناسراو بە ژینا ئەمینی تەمەن 22 ساڵ لە وێستگەیەکی میترۆی تاران، لەلایەن پۆلیسی ئیرشادی ئێرانەوە بە بیانووی نەگونجاوی جلوبەرگەکەی لەگەڵ یاساکانی ئێران دەستبەسەر کرا. دواتر پۆلیس ڕایگەیاند، ژینا لە وێستگەکە دووچاری جەڵتەی مێشک بووە. بەڵام ڕاپۆرتی ڕێکخراوەکانی مافی مرۆڤ لە ئێران هەر زوو وتیان بەهۆی لێدانەوە دووچاری خوێنبەربوونی مێشک بووە. ڕۆژی 16ـی مانگ دوای سێ ڕۆژ مانەوە لە نەخۆشخانەی (کەسرای) تاران گیانی لەدەستدا و ڕۆژی دواتر ناڕەزاییی سەرانسەری ئێرانی گرتووە و جوڵانەوەیەکی فراوان بەناوی "ژن، ژیان، ئازادی" زۆربەی شارەکانی ئێرانی گرتەوە.

لێدوانی فەرمی: ئەرسەلان یار ئەحمەدی، سەرۆکی ڕێکخراوی مافی مرۆڤی هەنگاو بە ئاڤا میدیای ڕاگەیاند، لەماوەی سێ ساڵی بزوتنەوەی "ژن، ژیان، ئازادی" 143 کورد پەیوەست بە ڕووداوە جۆراوجۆرەکانی ئەم ماوەیە لە سەرجەم شارەکانی ڕۆژهەڵاتی کوردستان کوژراون، دوا هەمینیان ڕەزا ڕەسایی بوو کە سزای لە سێدارەدانی لەسەر جێبەجێ کراوە.

ژمارەکان وادەڵێن: بەپێی وتەی سەرۆکی ڕێکخراوی مافی مرۆڤی هەنگاو، لەو 143 کوردە زۆرترینی لە خۆپیشاندانەکانی شاری سنە بووە، کە 22 کەس بە گولـلەی  ڕاستەوخۆی هێزە ئەمنییەکان لەو شارە کوژراون. هاوکات 16 مناڵی خوار تەمەنی 18 ساڵیش لە خۆپیشاندانەکان کوژراون.

 ئەمەش بزانە: دوای مردنی ژینا ئەمینی، چەند خەڵاتی نێودەوڵەتی لەبواری داکۆکی لە ئازادی بەخشران بە چالاکوانان. ساڵێک دوای مردنی، پەرلەمانی ئەوروپا خەڵاتی ساخارۆفی بەخشی بە ژینا ئەمینی. ئەم خەڵاتە دەدرێت بەوانەی لەپێناو ئازادی و داکۆکی لە مافەکانی مرۆڤ گیانی خۆیان دەبەخشن.