ئەمریكا و كوردستان جەخت لە بەردەوامبوونی پرۆسەی چاكسازیی هێزی پێشمەرگە دەكەنەوە

ئاڤا نیوز

لەچوارچێوەی پرۆسەی چاکسازیی هێزەکانی پێشمەرگە و یەکخستنەوەیان، کۆبوونەوەکانی هەرێمی کوردستان و ئەمەریکا بەردەوامن، بۆ ئەم مەبەستە دوا هەنگاوەکانی پرۆسەکە و ئەو قۆناخانەی کە ماون، خرانە ڕوو.

وێنە گەورەکە: کابینەی نۆیەمی حکومەتی هەرێمی کوردستان کاری زۆری کردووە بۆ یەکگرتنەوەی هێزەکانی پێشمەرگە، بەپێی ئەو لێکتێگەیشتنەش کە وەزارەتی پێشمەرگە و هێزەکانی هاوپەیمانان کردوویانە، تاوەکو ساڵی 2026 دەبێت هەموو هێزەکانی پێشمەرگە یەکخرابن.

ڕاگەیێنراوی فەرمی: وەزارەتی پێشمەرگە ڕایگەیاند، ئەمڕۆ سێشەممە 16-9-2025 گەڕێکی دیکەی کۆبوونەوە هاوبەشەکانی نێوان بەرپرسانی ژمارەیەک لە دامەزراوە پەیوەندیدارەکانی هەرێمی کوردستان و شاندێکی سەربازی و دیپلۆماسیی ئەمەریکا، بۆ گفتوگۆکردن لەبارەی پرۆسەی چاکسازی و ڕێکخستنەوەی هێزی پێشمەرگە بەڕێوەچوو.

لە کۆبوونەوەکەدا، جەخت لە گرنگیی سەرخستنی پرۆسەی چاکسازیی هێزی پێشمەرگە و پێویستیی یەکخستنەوەیان کرا. هاوکات دوا هەنگاوەکانی پرۆسەکە و ئەو قۆناخانەی کە ماون، خرانە ڕوو.

هەر لە کۆبوونەوەکەدا، هەوڵ و هەنگاوی هاوبەش بە ئاراستەی خێراکردنی پرۆسەکە و چارەسەرکردنی ئاستەنگەکانی بەردەمی دووپات کرایەوە و بیروڕا سەبارەت بە فراوانکردنی هەماهەنگی و هاریکاری لە نێوان هەردوولادا، ئاڵوگۆڕ کرا.

ئەمەش بزانە: کۆبوونەوەکە بە ئامادەبوونی جێگری سەرۆکی هەرێمی کوردستان و وەزیری پێشمەرگە و بەرپرسانی باڵای حکومەتی هەرێمی کوردستان و وەزارەتی پێشمەرگە لە سەرۆکایەتیی هەرێمی کوردستان بەڕێوەچوو.