دەست بەجێبەجێکردنی پرۆژەی پشتێنەی سەوزایی هەولێر دەکرێت

ئاڤا نیوز

حکومەتی هەرێمی کوردستان دەست بە جێبەجێکردنی پرۆژەی پشتێنەی سەوزایی هەولێر دەکات و لەم ڕێگەیەشەوە سەدان هەلی کار ڕادەگەیێنێت.

وێنە گەورەکە: پشتێنەی سەوزایی هەولێر، یەکێکە لە پرۆژە ستراتیژییەکانی حکومەتی هەرێمی کوردستان لە کابینەی نۆیەمدا، پرۆژەکە بە چارەسەرێکی گونجاو بۆ کەمکردنەوەی دیاردەی خۆڵبارین و بەرزکردنەوەی ڕێژەی سەوزایی دادەنرێت.

بینراو و بیستراو: فەرمانگەی میدیا و زانیاریی حکومەتی هەرێمی کوردستان لەڕێگەی بڵاوکردنەوەی ڤیدیۆیەک، دەستپێکردنی پرۆژەی پشتێنەی سەوزایی هەولێری ڕاگەیاند کە بەشێوەی بازنەیی لە دەرەوەی شەقامی 150 مەتریی هەولێر جێبەجێ دەکرێت.

فەرمانگەی میدیا و زانیاری ئاماژە بەوە دەکات، لەو پرۆژەیەدا حەوت ملیۆن نەمامی فستق و زەیتوون دەچێنرێن، بۆ ئەم مەبەستەش 10 پۆندی گەورەی گلدانەوەی ئاو دروست دەکرێن.

بۆچی گرنگە: بە تەواوبوونی پرۆژەکە:

- 140 بۆ 210 تۆن گازی دووانەئۆکسیدی کاربۆن کەم دەکاتەوە.

- ڕێژەی سەوزایی زیاد دەکات و هەوای هەولێر پاک دەکاتەوە.

- پلەکانی گەرما دادەبەزێنێت.

- بەرەنگاربوونەوەی بە بیابانبوون و باشترکردنی تەندروستیی گشتی و کوالێتی ژیان.

- ڕەخساندنی هەلی کار بۆ زیاتر لە سەدان کەس.

- زیادکردنی بەرهەمی کشتوکاڵیی ناوخۆ.