سعوودیە و قەتەر پشتیوانیی "نەخشە ڕێگە"ی چارەسەرکردنی قەیرانی سوەیدای سووریا دەکەن

ئاڤا نیوز

قەتەر و سعوودیە پێشوازییان لەو نەخشەڕێگایە کرد کە سووریا و ئوردن و ئەمریکا لەسەری ڕێککەوتوون بۆ چارەسەرکردنی قەیرانی پارێزگای سوەیدا و چەسپاندنی سەقامگیری لە باشووری سووریا.

 

چیرۆکی سەرەکی: ڕۆژی سێشەممە، دیمەشق ڕێککەوتنی خۆی لەگەڵ ئوردن و ئەمریکا لەسەر "نەخشەڕێگایەک بۆ چارەسەرکردنی قەیرانی سوەیدا" ڕاگەیاند، کە لەسەر بنەمای یەکگرتوویی خاکی سوریا و هاووڵاتیبوونی یەکسان بۆ هەموو سوورییەکان، لەگەڵ هەنگاوە پلەبەندەکان بۆ یەکخستنی تەواوەتی پارێزگاکە لەگەڵ دەوڵەتی سووریا.

 

ڕاگەیێنراوە فەرمییەکان: هەردوو وڵاتی قەتەر و سعوودیە لە دوو ڕاگەیێنراوی جیاواز، پێشوازییان لەو هەنگاوە کرد و هەوڵەکانی ئوردن و ئەمریکایان لەو چوارچێوەیە بەرز نرخاند.

 

ئەوەی پێویستە بیزانیت: قەتەر و سعوودیە پەیوەندییەکانیان لەگەڵ حکومەتی نوێی سووریا بەهێزە و بە دوو هاوپەیمانی بەهێزی ئەو وڵاتە لە ناوچەکە دادەنرێن، هەروەها ئەو وڵاتانە چەندین ڕێککەوتنی ئابووری، بازرگانی و وزەیان لەگەڵ سووریا واژۆ کردووە لە چەند مانگی ڕابردوودا.

 

باکگراوند؛ مانگی تەمموزی ڕابردوو لە پارێزگای سوەیدا شەڕ لە نێوان هێزەکانی حکومەتی سووریا و چەکدارانی پێکهاتەی درووز کە لایەنگری ئیسرائیلن سەریهەڵدا، لە ئەنجامدا زیاتر لە دوو هەزار کەس کوژران و بریندار بوون، هەروەها هەزاران کەسیش ئاوارەبوون بۆ ناوچەکانی دیمەشقی پایتەخت.