بڕی 783 ملیۆن دینار بۆ کارەبای سلێمانی دابین دەکرێت

ئاڤا نیوز

 

لەسەر داهاتی کارەبای سلێمانی، كەلوپەل و پێداویستی یەدەگ بە بڕی زیاتر لە 783 ملیۆن دینار بۆ گەنجینەكانی کارەبای ڕۆژهەڵات، ڕۆژئاوا، دەربەندیخان و دووکان دابین دەکرێت. ئەمەش وەک ئامادەکارییەک بۆ وەرزی زستان.

 

لێدوانی فەرمی: سیروان محەممەد، وتەبێژی کارەبای سلێمانی بە ئاڤا میدیای ڕاگەیاند، لە چوارچێوەی ئامادەکارییەکان بۆ وەرزی زستان، بەڕێوەبەرایەتیی گشتیی کارەبای سلێمانی له‌سه‌ر بودجه‌ی داهاتی (8%)ی کارەبا، هەڵدەستێت بە کڕینی كەلوپەل و پێداویستی یەدەگ بۆ گەنجینەی بەڕێوەبەرایەتییەكانی دابەشكردنی كارەبای سلێمانی (ڕۆژهەڵات، ڕۆژئاوا، دەرەبەندیخان و دووكان) به‌ بڕی 783 ملیۆن و 348 هەزار دینار.

 

وتەبێژی کارەبای سلێمانی دەڵێت، كڕینی كەلوپەلەكان بریتین لە: دابینكردنی پێداویستی یەدەگ بۆ گەنجینەكانی هەردوو بەڕێوەبەرایەتیی دابەشكردنی كارەبای سلێمانی، بەشی ڕۆژئاوا و بەڕێوەبەرایەتیی دابەشكردنی كارەبای دووكان، بە بڕی 450 ملیۆن دینار. پرۆژەکە لەلایەن كۆمپانیای برۆدكاست جێبەجێ دەكرێت و بڕیارە لە ماوەی 60 ڕۆژدا كەرەستەكان دابین بكرێن.

 

بە وتەی سیروان محەممەد، بەشێکی دیکەی پارەکە بەهەمان شێوە، بۆ کڕین و دابینکردنی كەرەستە و پێداویستی كارەبایە بۆ هەردوو بەشی ڕۆژهەڵات و بەڕێوەبەرایەتیی دابەشكردنی كارەبای دەربەندیخان لە بەڕێوەبەرایەتیی دابەشكردنی كارەبای سلێمانی، بودجەی پرۆژەكە [کڕین] 333 ملیۆن و 348 هەزار دینارە و  لەلایەن كۆمپانیای بۆسكان جێبەجێ دەكرێت. بڕیارە لە ماوەی 50 ڕۆژدا  کەرەستەکان دابین بكرێن.