خانوویەک لە گوندی کۆری چوار خاوەنی هەیە

ئاڤا نیوز

چیرۆکێکی سەیر لە گوندی کۆریی شاری هەولێر سەریهەڵداوە، کاتێک خانوویەک بووەتە موڵکی چوار کەس و کێشەیەکی یاسایی ئاڵۆزی دروست کردووە. کەسێک باس لەوە دەکات کە جگە لە خۆی، سێ خاوەنی تری خانووەکەی هەیە.

چیرۆکی سەرەکی: شێوازی پڕۆژەی گوندی کۆری وایە کە نابێت تا 10 ساڵ کڕین و فرۆشتنی موڵکەکانی پێوە بکرێت. بۆیە ئەو کەسەی دەیفرۆشێت دەبێت کۆمپیالە بۆ کڕیارەکە بکات.

زانیاریی بەدەستهاتوو: دوا خاوەنی خانووەکە، بە ئاڤای وت، کۆمپیالەی بە خاوەنی پێشوو کردووە بە بڕی پێنج دەفتەر دۆلار. بەڵام دوای ماوەیەک، یەک لە دوای یەک سێ کەسی تر سەردانیان کردووە و وەکو خاوەنی خانووەکە خۆیان ناساندووە و دەڵێن ئەوانیش گرێبەست و کۆمپیالەیان پێیە، بەو پێیەی یەک کەس خانووەکەی بە چوار کەس فرۆشتووە.

ئەو هاووڵاتییە دەڵێت: "سکاڵامان لە کابرای فێڵباز کرد، دەستگیر کرا و بە دوو ساڵ حکوم درا. بڕیاری دادگاش ئەوە بوو خانووەکە لە ماوەی مانگێکدا بخرێتە موزایەدەوە و هەر یەکەمان حەقی خۆمان وەرگرینەوە، بەڵام تا ئێستا ماوەیەکی زۆرە ئەو خانووە نەخراوەتە موزایەدەوە."

لێدوانی فەرمی: ئاراس ئەحمەد، بەڕێوەبەری کارگێڕی گوندی کۆری، بە ئاڤای ڕاگەیاند: "ئاگاداری بابەتەکەین، لای ئێمە تەنیا یەک کەس خاوەنی ئەو خانووەیە کە بەناوی کراوە، چونکە وەکالەتنامەی گشتیی کەسی یەکەممان پێبووە کە لێیان کڕیوە و بە فەرمی لە پارێزگای هەولێر بەناوی کراوە و یاساییە."

زیاتر ڕوونیکردەوە: "ئەو بەڕێزانەش کە خۆیان بە خاوەنی خانووەکە دەزانن، وەک ئەوە وایە مامەڵەی هەواییان کردبێت، چونکە هیچ بەڵگەنامەیەکی فەرمیان وەرنەگرتووە و تەنها وەسڵێک بووە. بەم جۆرە فێڵیان لێ کراوە."