کۆبوونەوەی ئەنجوومەنی دەوڵەت لەبارەی کوردستان گەیشتە ئەنجام

ئاڤا نیوز

چوارەم کۆبوونەوەی ئەنجوومەنی دەوڵەت لەبارەی داهاتی نانەوتی کوردستان کۆتایی هات و چاوەڕوان دەکرێت ڕەشنووسی کۆتایی وەکو وەڵام بۆ ئەنجوومەنی وەزیران ڕەوانە بکەن.

چیرۆکی سەرەکی: ئەنجومەنی دەوڵەتی عێراق، ئەمڕۆ چوارەم کۆبوونەوەی خۆی لەبارەی پرسی داهاتی ناوخۆ و پشکی هەرێمی کوردستان کرد، بەگوێرەی زانیارییەکان، ئەنجوومەنەکە بۆچوونی خۆی ڕاگەیاندووە و بە نووسراوێکی فەرمی وەڵامی ئەنجوومەنی وەزیرانی عێراق دەداتەوە.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند، شاندی هەرێمی کوردستان لە کۆبوونەوەی ئەنجوومەنی دەوڵەت بەشدار نەبووە.

لێدوانی فەرمی: ئەندامێکی ئەنجوومەنی دەوڵەت بە دەروون مەلا ناجی ڕاگەیاند، کۆبوونەوەکە کۆتایی هاتووە و لە ئێستادا سەرقاڵی نووسینەوەی ئەو بۆچوونانەن کە لە کۆبوونەوەکەدا گفتوگۆیان لەبارەیەوە کراوە و دواتر بە نووسراوێکی فەرمی ڕەوانەی ئەنجوومەنی وەزیرانی عێراقی دەکەن.

لەلایەکی دیکەوە: ئاڤا زانیویەتی وەزیرێکی ناو حکومەتی عێراق پێداگیری کردووە و داوای کردووە هەرێمی کوردستان نوێنەرێکی بنێرن بۆ کۆبوونەوەکە، بەڵام هەرێمی کوردستان ڕەتیکردووەتەوە، چونکە بەگوتەی ئەوان [هەرێمی کوردستان] ئەم کۆبوونەوەیە لە بنەڕەتدا داواکاریی حکومەتی عێراق بووە.