نزیکەی 200 حەشوەی گوللە ئاربیجی لە گوندێکی چوارقوڕنە دۆزرایەوە

ئاڤا نیوز

ئاسایشی ڕاپەڕین لەسنووری گوندی ئەستریلانی ناحیەی چوارقوڕنە لەئیدارەی ڕاپەڕین، نزیکەی 200 حەشوەی گوللە ئاربیجی و ژمارەیەک تەقەمەنیان لە چاڵی غەسالەکانی بەرهەمهێنانی چەو و لم دۆزییەوە.

ڕاگەیێنراوی فەرمی: ئاسایشی ڕاپەڕین ڕایگەیاند، تیمی هەڵگرتنەوەی چەک و تەقەمەنی لە بەڕێوەبەرایەتی ئاسایشی ڕاپەڕین ئاگادار کرایەوە لە هەبوونی ژمارەیەکی زۆر حەشوە ئاربیجی، گوللە هاوەنی قەبارە جیاواز و تەقەمەنی کۆن. تەقەمەنییەکان لەشوێنی کۆنی ئەو چاڵانەدا دەرکەوتوون کە پێشتر غەسالەکان دروستیانکردووە، لەلایەکی دیکەش هێزەکانی ئاسایشی شکارتە گوللە تۆپێکی کۆنیان لەگوندی چیوە هەڵگرتووەتەوە.

ئەمەش بزانە: ئاسایشی ڕاپەڕین داوا لەهاونیشتمانیان دەکات لە دەشتودەر، تەنیشت ڕەبیە کۆنەکان  یان لە شاخ و گرد و تەپۆلکەکان بەهیچ شێوەیەک دەستکاری مین وتەقەمەنیەکان نەکەن. ئەمەش لەبەرئەوەی بەشێک لەو تەقەمەنیانە هێشتا کاران بۆ تەقینەوە و مەترسیدارن.

باکگراوند: لەماوەی چەند مانگی ڕابردوودا ژمارەیەکی دیکە گوللە هاوەنی نەتەقیوو لەناو ئاوی زیێ بچووک لە سنوری قەزای پشدەر دۆزرانەوە.