موساد ڕەتی دەکاتەوە دەستی لە تیرۆرکردنی چالاکوانە ئەمریکییەکەدا هەبووبێت

ئاڤا نیوز

 

بەرپرسی پێشووی دەزگای هەواڵگریی ئیسرائیل (مۆساد) ڕەتیدەکاتەوە دەستی لە تیرۆرکردنی چارلی کێرک، نووسەر و چالاکوانی ڕاستڕەوی ئەمریکیدا هەبووبێت.

 

وێنە گەوەکە: چارلی کێرک ڕاستڕەوێکی کۆمارییەکان بوو کە لە هەڵمەتی بانگەشەکانی سەرۆکایەتیی ئەمریکا بانگەشەی بۆ دۆناڵد ترەمپ دەکرد. ڕۆژی چوارشەممە ڕێککەوتی 11ـی 9 لە کاتی قسەکردن بۆ جەماوەرێکی زۆر لە زانکۆی یوتا ڤالی تەقەی لێکرا و کوژرا. ئێستا لە سۆشیاڵ میدیای ئەمریکیدا ئەو بانگەشانە بڵاو بوونەتەوە کە گوایە ئیسرائیل دەستی لە کوشتنی چارلی کێرکدا هەبووبێت. 

 

لێدوانی فەرمی: یۆسی کۆهێن، بەڕێوەبەری پێشووتری مۆساد، لە وەڵامی پرسیارێکدا کە ئایا مۆساد کێرکی تیرۆر کردووە، ڕایگەیاند "بە ڕەهایی، نەخێر، مۆساد ئەو کارەی نەکردووە. موساد ئەو جۆرە کارانە ناکات و بە تیرۆری سیاسییەوە ناگلێت. ئەوەی کە گوایە مۆساد دەستی هەبووبێت هەڵە و خراپەیە."

 

زانیاریی زیاتر: کۆهێن گوتی "تەنانەت تسۆنامیش دەخەنە ئەستۆی مۆساد، کە گوایە دەیەوێت بە هۆیەوە هەندێک وڵات لەناو بچن و نەمێنن، بەڵام بە دڵنیاییەوە ئەوە درووست نییە، ئێمە ئەوە ناکەین و هەرگیزیش نایکەین. ئەمە ئەو شتە نییە کە ئێمە دەیکەین."

 

لەلایەکی دیکەوە: بنیامین نەتانیاهۆ، سەرۆکوەزیرانی ئیسرائیل، کاردانەوەی بەرامبەر بەو دەنگۆیانە نیشان دا و بە "بێمانا" و "هەڵە" وەسفی کردن  و گریمانەی ئەوەی خستە ڕوو کە دەشێت ئەو دەنگۆیانە بە پارەی قەتەر بڵاو کراببنەوە.