مەسرور بارزانی: لە هەوڵەکانمان بەردەوام دەبین ڕێککەوتنی شنگال جێبەجێ بکرێت

ئاڤا نیوز


سەرۆکوەزیران مەسرور بارزانی ڕایگەیاند: ئێمە هەوڵێکی جددیمان داوە بۆ ئەوەی ڕێککەوتنی شنگال لەگەڵ حکومەتی فیدراڵ جێبەجێ بکرێت، بەڵام تاوەکو ئێستا جێبەجێ نەکراوە.

چیرۆکی سەرەکی: مەسرور بارزانی، سەرۆکوەزیرانی کوردستان لەمیانی کردنەوەی ڕێگای جووتسایدی شێخان – لالش، وتارێکی پێشکەش کرد و ئاماژەی بە دۆخی شنگال و گرنگیی دەڤەرەکە و کوردانی ئێزدی کرد وەک بەشێکی ڕەسەنی کوردستان. بەڵێنیشی پێدان لە ئاوەدانکردنەوەی ناوچەکە بەردەوام دەبن و پڕۆژەی زیاتر پێشکەش بە دەڤەرەکە بکەن.

لێدوانی فەرمی:  مەسرور بارزانی بە پەیامێکی تایبەت بۆ کوردانی ئێزدی دەستی بە قسەکانی کرد و گوتی: "خوشك و برایانی ئێمەی ئێزدی بەشێكی ڕەسەنی كوردستانن، هەروەك جەنابی سەرۆك بارزانی فەرمووی: كوردی رەسەن ئێزدینە. لەبەرئەوە بەهیچ جۆرێك ئێمە لێك جیاناكرێینەوە".

سەرۆکوەزیرانی کوردستان جارێکی دیکە دووپاتی لەسەر پێکەوەژیان کردەوە و گوتی: ئەم پێكەوەژیانەی لە كوردستاندا هەیە و ئەم پەیوەندییە ڕەسەنەی لەنێوان ئێزدی و ئێمەدایە بەهیچ شتێك لێك جیاناكرێتەوە، هەرچەندە هەوڵی زۆر دەدرێن بۆ ئەوەی خوشك و برایانی ئێزدیی ئێمە لە شنگال دوور بخەنەوە". جەختیشی کردەوە کە "خەڵک و خاك و ئاوی ئێمە" بەهیچ پیلانێكی سیاسی لێك جیاناكرێنەوە.

بابەتی ستراتیژی: ڕێککەوتنامەی شنگال کە ساڵی 2020 لەنێوان هەردوو حکومەتی کوردستان و عێراق بۆ ئاساییکردنەوەی دۆخی قەزاکە و دەوروبەری واژۆ کرا، یەکێکی تر بوو لەو تەوەرانەی مەسرور بارزانی قسەی لەسەر کرد، لەمڕووەوە گوتی: "هەوڵێكی جددیمان دا بۆ ئەوەی جێبەجێ بكرێت، بەڵام بەهۆی هەندێک هێزی لە یاسادەرچوو کە خۆیان بەسەر دەڤەرەکەدا سەپاندووە، تاوەکو ئێستا جێبەجێ نەکراوە، لە هەوڵەکانیشمان بەردەوام دەبین".

مەسرور بارزانی داوای لە حکومەتی عێراق کرد هەنگاوی جددی بنێن و ئاسانكاریی بكرێت تاوەكو کوردانی ئێزدی بە سەربڵندی بگەڕێنەوە شنگال. بەڵێنیشی دا بەردەوام دەبن بۆ ئەوەی هەموو هاووڵاتیان چ ئێزدی بن، موسڵمان بن، عەرەب بن، توركمان بن، كریستیان بن، بە سەربڵندی بگەڕێنەوە سەر ماڵ و حاڵی خۆیان لە دەڤەرەکە کە بەهۆی هێرشی داعش لە ساڵی 2014 ئاوارە بوون.