نەتانیاهۆ داوا دەکات میسر ژمارەی سەربازەکانی لە سینا کەمبکاتەوە

ئاڤا نیوز

بەپێی زانیارییەکانی پێگەی ئەکسیۆسی ئەمریکی، بنیامین نەتانیاهۆ، سەرۆکوەزیرانی ئیسرائیل، داوای لە ئیدارەی ترەمپ کردووە گوشار بخاتە سەر میسر بۆ کەمکردنەوەی سەربازەکانی لە نیمچەدوورگەی سینا.

چیرۆکی سەرەکی: زیادکردنی هێزی میسر لە نیمچەدوورگەی سینا بووەتە خاڵێکی دیکەی گرژیی لەنێوان ئیسرائیل و ئەو وڵاتە، بەتایبەتی لەگەڵ بەردەوامبوونی شەڕی غەززە.

زانیاریی زیاتر: لەکاتی کۆبوونەوەی لەگەڵ مارکۆ ڕۆبیۆ، وەزیری دەرەوەی ئەمریکا لە قودس، نەتانیاهۆ لیستی ئەو چالاکییانەی لە سینا خستووەتەڕوو کە بە پێشێلکارییەکی گەورەی ڕێککەوتنی ئاشتی ساڵی 1979ـی نێوان میسر و ئیسرائیل دایانناوە.

ئەوەی پێویستە بیزانیت: بەرپرسانی ئیسرائیل دەڵێن، میسر ژێرخانی سەربازی لە ناوچەکە دروست کردووە کە هەندێکیان دەکرێت بۆ مەبەستی هێرشبردن بەکاربهێنرێن، لەو ناوچانەی کە تەنیا چەکی سووک ڕێگەپێدراوە بەپێی پەیماننامەکە.

هێزەکانی میسر ڕێڕەوی فڕۆکەخانەکانیان لە بنکە ئاسمانییەکانی سینا درێژکردووەتەوە بۆ ئەوەی بتوانن فڕۆکەی جەنگی بەکاربهێنن، هەروەها پێگەی سەربازیان لە ژێرزەویدا دروست کردووە کە هەواڵگری ئیسرائیلی پێی وایە دەکرێت بۆ هەڵگرتنی مووشەک بەکاربهێنرێن.

زانیاری بەدەستهاتوو: بەرپرسانی ئیسرائیلی دەڵێن دوای ئەوەی گفتوگۆی ڕاستەوخۆ لەگەڵ میسرییەکان هیچ پێشکەوتنێکی بەخۆوە نەبینی، ئیسرائیل بڕیاریدا داوا لە ئیدارەی ترەمپ بکات دەستوەردان بکات، چونکە ئەوەی میسرییەکان لە سینا دەیکەن جدییە و ئێمەی زۆر نیگەران کردووە.

لەلایەکی دیکەوە: میسر نیگەرانە لەوەی حکومەتی نەتانیاهۆ دەیەوێت بەشێک یان هەموو فەڵەستینییەکانی غەززە بەرەو سینا پاڵ بنێت، میسر هێزەکانی لەسەر سنووری غەززە زیاتر کردووە و ڕایگەیاندووە کە لێشاوی پەنابەرانی فەڵەستینی وەک هەڕەشەیەک بۆ ئاسایشی نەتەوەیی میسر مامەڵەی لەگەڵ دەکرێت.

ئەمەش بزانە: دوای هێرشەکەی ئیسرائیل بۆ سەر قەتەر لە سەرەتای ئەم مانگەدا، عەبدولفەتاح سیسی، سەرۆکی میسر لە وتارێکیدا لە دەوحە، هۆشداری دا کە نەتانیاهۆ ڕێککەوتنی ئاشتی لەگەڵ میسر دەخاتە مەترسییەوە و ئاساییکردنەوەی زیاتری پەیوەندییەکان لەگەڵ وڵاتانی ناوچەکە دەکاتە کارێکی مەحاڵ.