تەواوی ڕێگەی نێوان دووكان - چوارقوڕنە دەكرێتە دووساید

ئاڤا نیوز

لە ئاییندەیەكی نزیكدا پڕۆژەی بە دووسایدكردنی (دووكان - خەلەكان - هیزۆپ) دەكەوێتە باری جێبەجێكردن، وەزارەتی ئاوەدانكردنەوە و نیشتەجێكردن، ئامادەكاریی پێویستی بۆ دەستپێكردنی پرۆژەكە كردووە.

وێنە گەورەكە: لە چوارچێوەی بایەخپێدانی حكومەتی هەرێمی كوردستان بە ڕێگاوبان، 202 پرۆژەی نوێی ڕێگاوبان لە سەرتاسەری هەرێمی كوردستان، ئێستا لەژێر جێبەجێكردن دان، بەشێكیان بەهۆی گرفتی داراییەوە بەشێوەیەكی كاتی ڕاگیراون و 40 پڕۆژە كاركردن تێیاندا بەردەوامە، یەكێك لەو پڕۆژە گرنگانە بە دووسایدكردنی ڕێگەی نێوان دووكان و چوارقوڕنەیە.

ئەوەی پێویستە بیزانیت: پڕۆژەی دروستكردنی جووتسایدی دووكان - چوارقوڕنە لە سێ قۆناغ پێكهاتووە؛ قۆناغی یەكەمی پڕۆژەكە كە لە ناحیەی چوارقوڕنەوە دەستپێدەكات تاوەكو مەفرەقی هیزۆپ، تەواو بووە و تەنیا كاری هێڵكاریی شەقامەكە و دانانی هێماكانی هاتووچۆی ماوە، قۆناغی دووەمیش كە لە مەفرەقی هیزۆپەوە دەستپێدەكات تاوەكو خەلەكان، كۆمپانیای جێبەجێكاری پێشوو، نزیكەی 45%ـی پڕۆژەكەی جێبەجێكرد و كارەكانی جێهێشتووە، ئێستا كۆمپانیایێكی دیكە، قۆناغی دووەمی پڕۆژەكە و قۆناغی سێیەمیشی جێبەجێ دەكات كە تەواوكردنی ڕێگاكەیە لە خەلەكان بەرەو شارۆچكەی دووكان.

لێدوانی فەرمی: د. ئاگرین عەبدوڵڵا، بریكاری وەزارەتی ئاوەدانكردنەوە و نیشتەجێكردن تایبەت بە ئاڤا ڕایگەیاند، بۆ تەواوكردنی پڕۆژەی بەدووسایدكردنی دووكان - خەلەكان - هیزۆپ، گرێبەستێكی تازەمان لەگەڵ كۆمپانیایێكی بەئەزموونی بواری ڕێگاوبان واژۆ كردووە، ئامادەكارییەكانیش بۆ دەستپێكردنی پڕۆژەكە تەواوبووە.

زانیاریی زیاتر: بریكاری وەزارەتی ئاوەدانكردنەوە و نیشتەجێكردن ئەوەشی خستەڕوو، بەهۆی ئەوەی ڕێگاكە بە ناوچەیەكی شاخاویدا تێدەپەڕێت، بۆیە بۆ تەواوكردنی پڕۆژەكە ماوەیەكی زۆری پێویستە و ماوەی دیاریكراو سێ ساڵە كە لەم مانگەوە دەست بە جێبەجێكردنی دەكرێت.