یەکەم نەخۆشخانەی منداڵان لەزاخۆ دەكرێتەوە

ئاڤا نیوز

سەرۆکوەزیران مەسرور بارزانی، لە چوارچێوەی سەردانەکەی بۆ زاخۆ یەكەم نەخۆشخانەی منداڵان لەو سنوورە دەکاتەوە، کە 90 قەرەوێڵەییە و چەند خزمەتگوزارییەکی جیاواز لەخۆدەگرێت.

وێنە گەورەکە: بەرەوپێشچوونی کەرتی تەندروستی یەکێک بووە لە ئامانجە بنەڕەتییەکانی کابینەی نۆیەمی حکومەتی هەرێمی کوردستان، لەو ڕوانگەیەشەوە سەرۆکوەزیران مەسرور بارزانی، لە چوارەم ساڵیادی ئیدارەی سەربەخۆی زاخۆ ئامادە دەبێت و نەخۆشخانەیەکی تایبەت بە منداڵان دەکاتەوە.

زانیاریی پەیامنێر: جاسم محەممەد، پەیامنێری ئاڤا لە زاخۆ گوتی، "ڕووبەری نەخۆشخانەکە هەزار و 400 مەتر دووجایە و سێ نهۆم لەخۆدەگرێت، 90 قەرەوێڵەییە و کۆمەڵێک خزمەتگوزاری لەخۆدەگرێت."

زانیاریی زیاتر: نهۆمی یەکەمی نەخۆشخانەکە ڕاوێژکارییە و پزیشکی ڕاوێژکاری لێدەبێت، نهۆمی دووەم فریاکەوتن، تاقیگە، دەرمانخانە و چەند بەشێکی دیکە لەخۆدەگرێت، نهۆمی سێیەم 90 قەرەوێڵە بۆ مانەوە و چارەسەری منداڵان تەرخانکراوە.