پزیشکیان: ئێران بەرامبەر سزاکان خۆی ڕادەست ناکات

ئاڤا نیوز

سەرۆککۆماری ئێران ڕایگەیاند، وڵاتەکەی بەسەر سزا نێودەوڵەتییەکاندا سەردەکەوێت و هەرگیز بەرامبەریان خۆی ڕادەست ناکات، جەختیشیکردەوە لەوەی بەربەستی گەورەیان بڕیووە و کاروانی پێشکەوتن ڕاناگیرێت.

چیرۆکی سەرەکی: ئێوارەی ڕۆژی هەینی ئەنجوومەنی ئاسایشی نێودەوڵەتی هەڵگرتنی سزاکانی سەر ئێرانی ڕەتکردەوە و تارانی تۆمەتبارکرد بە پابەندنەبوون بە ڕێککەوتنی ئەتۆمی ساڵی 2015، بەریتانیا، فەرەنسا و ئەڵمانیاش ڕایانگەیاند، دوای بڕیارەکە سەرجەم سزا نێودەوڵەتییەکان بۆ سەر ئێران دەگەڕێنرێنەوە.

لێدوانی فەرمی: مەسعوود پزیشکیان، سەرۆککۆماری ئێران ئەمڕۆ شەممە لە وتارێکدا ئاماژەی بەوەكرد، گەلی ئێران هەرگیز ملکەچی پیلانی دوژمنان نابێت و  لە بەرامبەر گوشارەکانیان چۆک دانادات، بەهۆی باوەڕیشیان بە تواناکانیان بەربەستی گەورەیان بڕیوە و دوژمنان ناتوانن کاروانی پێشکەوتنی ئێران ڕابگرن.

زانیاریی زیاتر: پزیشکیان زیاتر گوتی، "هەرگیز ناتوانن ڕامانبگرن، ڕەنگە بتوانن نەتەنز و فۆردو بکەنە ئامانج، بەڵام نازانن کە مرۆڤ نەتەنز و فۆردویان دروستکردووە و هەر ئەوانیش سەرلەنوێ بونیادی دەنێننەوە، بۆیەش ئێمە هەرگیز بەرامبەر داواکارییە زیادەڕۆکان ڕازی نابین، چونکە توانامان هەیە دۆخەکە بگۆڕین."