سەرۆکوەزیران مەسرور بارزانی زەنگی ساڵی نوێی خوێندنی لە زاخۆ لێدا

ئاڤا نیوز

سەرۆکوەزیران مەسرور بارزانی لەدەستپێکی ساڵی نوێی خوێند ڕایگەیاند: سوپاسی مامۆستایانی بەڕێز دەکەم، سەرەڕای ئاستەنگەکان نەیانهێشتووە پرۆسەی خوێندن پەکی بکەوێت.

چیرۆکی سەرەکی: ئەمڕۆ یەکشەممە 21-9-2025 سەرۆکوەزیران مەسرور بارزانی، زەنگی ساڵی نوێی خوێندنی ساڵی 2025-2026 لە قوتابخانەی دمدمی تێکەڵاوی زاخۆ لێدا.

لێدوانی فەرمی: سەرۆکوەزیران مەسرور بارزانی گوتی: سوپاسی مامۆستایانی بەڕێز دەکەم، کە سەرەڕای ئاستەنگەکان نەیانهێشتووە پرۆسەی خوێندن پەکی بکەوێت و نەیانهێشتووە قوتابییان لە خوێندن بێبەش بن، هیوادارین لە ئایندەیەکی نزیک ئەو قەیرانانە کۆتاییان بێت و سەرجەم مووچەخۆران مافی خۆیان وەردەگرن.

ئەمڕۆ کە هاوکات ساڵیادی ڕاگەیاندنی ئیدارەی سەربەخۆی زاخۆیە، پیرۆزبایی لە خەڵکی زاخۆ دەکەم و هیوادارم هەمیشە زاخۆ لە پێشکەوتن بێت، زاخۆ هەمیشە پێشەنگ بووە لە نیشتمانپەروەری و خۆڕاگری و بەرگری لە وڵات، بێگومان خزمەتی زیاتر بە هاونیشتمانیانی ئیدارەی سەربەخۆی زاخۆ دەکەین.

سەرۆک وەزیران ئەمانەشی گوت:  

- لە ماوەی ڕابردوودا کاری گەورەکراوە بۆ سێکتەری پەروەردە و گۆڕانکاری گەورە لە پرۆسەی خوێندن لە هەرێمی کوردستان کراوە.

- سیستمی ئی پەروەردە یەکێکە لە پرۆژە گرنگ و مێژووییەکانی کەرتی پەروەردە، هەموو داتای خوێندن لەسەر ئاستی هەرێمی کوردستان بەشێوەی ئەلیکترۆنی بەردەستە و بڕیار لەسەر بنەمای زانستی دراوە.

- پرۆگرامی دیکە هەن و لەداهاتوودا دەیخەینە بواری جێبەجێکردن و کاریگەریی زۆریان لەسەر بەرەوپێشبردنی پەروەردە دەبێت.

- زیاتر لە 200 قوتابخانە دروستکراون و دووهەزار قوتابخانە نۆژەنکراونەتەوە و هەوڵەکانمان بەردەوام دەبێت بۆ دروستکردنی قوتابخانە و ناوەندی زانستی زیاتر.

- لە ڕووی زانستی داوا لەمامۆستایان و دایک و باوکان دەکەین، بابەتی ژینگە و نیشتمان پەروەریی بکەنە بەشێک لە ئەولەویەت لە ناوەندەکانی خوێندن. 

ژمارەکان وەدەڵێن: وەک ئامادەکارییەک بۆ ئەمساڵی خوێندن چەندین کاری پێویست کراون:- نزیکەی حەوت هەزار و 500 ناوەندی خوێندن دەکرێنەوە، هاوکات یەک ملیۆن و 950 هەزار قوتابی و زیاتر لە 180 هەزار مامۆستا و فەرمانبەر بەشداریی پرۆسەی ساڵی نوێی خوێندن دەکەن. 
 
هەر ئەمساڵ 160 هەزار قوتابی نوێ تۆمارکراون، پێشبینی دەکرێت ژمارەکە بەرز ببێتەوە بۆ 180 هەزار قوتابی، بۆ ئەم مەبەستەش 434 قوتابخانە نۆژەنکراونەتەوە، کارکردن لە 30 قوتابخانەش بەردەوامە، هاوکات 28  قوتابخانەی نوێ دروستکراون کە دەکاتە 309 ژووری نوێ خوێندن. 

هەر بۆ خوێندنی ئەمساڵ 22 ملیۆن و 134 هەزار پەرتووکی نوێ چاپکراون، 

ئەوەی پێویستە بیزانیت: لە ماوەی کابینەی نۆیەمدا ئەم پرۆژانە لە بواری ژێرخانی پەروەردە جێبەجێ کراون: 214 قوتابخانەی نوێ دروستکراون، چوار هەزار و 441 هۆبەی نوێی خوێندن لەڕووی ژێرخانەوە دروستکراوە کە شوێنی زیاتر لە 110 هەزار قوتابی دەبێتەوە.

گۆشەیەکی دیکەی دیمەنەکە: لە کابینەی نۆیەمدا 33 هەزار و 341 قوتابی کە لە خوێندن دابڕابوون، گەڕێنراونەتەوە بەر خوێندن.