مەسرور بارزانی: نەخۆشخانەی منداڵانی زاخۆ بۆ خزمەتی هاونیشتمانیان دروستکراوە

ئاڤا نیوز

سەرۆکوەزیران مەسرور بارزانی یەکەم نەخۆشخانەی منداڵانی لە زاخۆ کردەوە و دووپاتی دەکاتەوە بەردەوام دەبن لە خزمەتکردنی خەڵک و دابینکردنی خزمەتگوزایی زیاتر بۆ هاونیشتمانیان.

چیرۆکی سەرەکی: ئەمڕۆ یەکشەممە مەسرور بارزانی، زەنگی ساڵی نوێی خوێندنی 2025-2026ـی لە قوتابخانەی دمدمی تێکەڵاو لە زاخۆ لێدا، هاوکات لە 7500 ناوەند ساڵی نوێی خوێندن دەستیپێکرد, دواتریش سەرۆکوەزیران نەخۆشخانەی منداڵانی لە زاخۆ کردەوە. 

لێدوانی فەرمی: سەرۆکوەزیران مەسرور بارزانی لە ڕێوڕەسمی کردنەوەی نەخۆشخانەی منداڵان لە زاخۆ ڕایگەیاند: حکومەتی هەرێمی کوردستان بەردەوام پشتیوان دەبێت بۆ خزمەتی هاووڵاتییان, خۆشحاڵین کە ئەم نەخۆشخانەیە بە بەرزترین کوالێتی بۆ خزمەتی هاونیشتمانییان دروستکراوە، هیوادارم هیچ کەسیش پێویستی بە سەردانی نەخۆشخانە نەبێت.

- ئەمڕۆ چوارەمین ساڵیادی دامەزراندنی ئیدارەی سەربەخۆی زاخۆیە، لەماوەی ئەم چەند ساڵە بەهەوڵی هەموولایەک و سەرپەرشتیاری ئیدارەکە ناوچەکە بووەتە شوێنێکی سەرنجڕاکێش، هاونیشتمانیان و گەشتیاران لە هەموو لایەکەوە سەردانی دەکەن. 

ئەوەی پێویستە بیزانیت: نەخۆشخانەی منداڵانی زاخۆ، لەسەر ڕووبەری هەزار و 400 مەتر دووجا دروست کراوە، سێ نهۆم لەخۆ دەگرێت، کۆمەڵێک خزمەتگوزاریی لەخۆدەگرێت، نهۆمی یەکەمی نەخۆشخانە ڕاوێژکارییە و پزیشکی ڕاوێژکاری لێدەبێت، نهۆمی دووەم فریاکەوتن، تاقیگە، دەرمانخانە و چەند بەشێکی دیکە لەخۆدەگرێت، نهۆمی سێیەم 90 قەرەوێڵە بۆ مانەوە و چارەسەری منداڵان تەرخانکراوە.