سەرۆک بارزانی: یەکێتی زانایانی ئیسلامی کوردستان لە ڕاسپاردەی بارزانی نەمر دامەزراوە

ئاڤا نیوز

بەبۆنەی 55 ساڵەی دامەزراندنی یەکێتی زانایانی ئاینی ئیسلامی کوردستان، سەرۆک مەسعود بارزانی پەیامێکی پیرۆزبایی بڵاوکردەوە و دەڵێت: دامەزراندنی ئەم یەکێتییە لەسەر ڕاسپاردەی بارزانی نەمر بووە.

وێنە گەورەکە: بەشێک لە ڕێکخراوە پێشەییەکانی هەرێمی کوردستان پێشینەی دامەزراندنیان دەگەڕێتەوە بۆ سەروەختی شۆڕشی ئەیلوول. یەکێک لەو ڕێکخراوانە یەکێتی زانایانی ئاینی ئیسلامی کوردستان بوو کە لە 21-9-1970 لە شاخ دامەزرا.

ڕاگەیێنراوی فەرمی: بۆ ساڵیادی دامەزراندنی یەکێتی زانایانی ئاینی ئیسلامی کوردستان سەرۆک مەسعود بارزانی ئەم پەیامەی بڵاوکردەوە "بەبۆنەی 55 ساڵەی دامەزراندنی یەكێتیی زانایانی ئایینی ئیسلامیی كوردستانەوە پیرۆزبایی گەرم لە سەرۆك و ئەندامانی مەكتەبی تەنفیزی و ئەنجوومەنی ناوەندیی یەكێتیی زانایان و سەرجەم مامۆستایانی ئایینی پیرۆزی ئیسلام لە كوردستان دەكەم".

لە بەشێکی دیکەی پەیامەکەی سەرۆک بارزانی دەڵێت: دامەزراندنی یەكێتیی زانایانی ئایینی ئیسلامیی كوردستان لەسەر ڕاسپاردەی بارزانیی نەمر هەنگاوێكی مێژوویی بوو بە ئاراستەی بەهێزكردنی ڕۆڵی مامۆستایانی ئایینی لە شۆڕش و خەباتی گەلەكەمان. ئەم بڕیارە جەختكردنەوە بوو لەسەر پێگەی مامۆستایان و گەورەزانایانی كوردی ئایینی ئیسلام لە بڵاوكردنەوەی تێگەیشتنی نەتەوەیی و نیشتیمانپەروەری و پێكەوەژیان لەناو چینوتوێژەكانی كۆمەڵگە و ڕۆڵیان لە بەرەوپێشەوەبردنی دۆزی ڕەوای گەلەكەمان لە گشت قۆناغەكاندا.

 سەرۆک بارزانی دەشڵێت: لە یادی دامەزراندنی یەكێتیی زانایانی ئایینی ئیسلامیی كوردستان هیوای سەركەوتن بۆ یەكێتی زانایانی ئایینی ئیسلامیی كوردستان و سەرجەم مامۆستایانی ئایینی بەڕێز دەخوازم و دەستخۆشی لە ماندووبوون و ئەركە پیرۆزەكەیان دەكەم.