شاخەوان عەبدوڵڵا: بیری شۆڤێنیی گواستنەوەی ڕاژەی مامۆستایانی ناوچە کوردستانییەکانی بۆسەر بەغدا پەکخست

ئاڤا نیوز

جێگری سەرۆکی پەرلەمانی عێراق دەڵێت، لەکاتی پەسەندکردنی بودجەدا دەسەڵاتی خۆیان بۆ گواستنەوەی 15 هەزار و 900 مامۆستا و فەرمانبەری  ناوچەكانی دەرەوەی هەرێمی كوردستان بۆ سەر بەغدا بەکارهێنا، بەڵام "بیری شۆڤێنیی" گواستنەوەی ڕاژەی مامۆستایانی پەکخست.

وێنە گەورەکە: 21ی ئابی ئەمساڵ  ئیبراهیم نامس جبووری، وەزیری پەروەردەی عێراق لە لێدوانێکی تایبەتدا بە ئاڤا میدیای ڕاگەیاند،گواستنەوەی ڕاژەی مامۆستایان لە سنووری کەرکووک و نەینەوا لە حکومەتی کوردستانەوە بۆسەر حکومەتی فیدراڵ هەرچەندە لە یاسای بودجە و ڕێککەوتنەکاندا هەیە، بەڵام ئێستا وڵات یەک بودجەی هەیە و وەزارەتی دارایی عێراق بەیەکجار و پێکەوە مانگانە مووچە بۆ کوردستان و هەموو ناوچەکانی دیکەی وڵات خەرج دەکات، ئەوەشی وەک هۆکارێک بۆ نەگواستنەوەی مامۆستایان لە قەڵەمدا.

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق لە کەرکووک بە ڕۆژنامەنووسانی ڕاگەیاند، لەکاتی پەسەندکردنی بودجەی عێراق، لە سەرۆکایەتی پەرلەمان دەسەڵاتی خۆیان بۆ گواستنەوەی ڕاژەی 15 هەزار و 900 مامۆستا و فەرمانبەری  ناوچەكانی دەرەوەی هەرێمی كوردستان بۆ سەر بەغدا بەکارهێنا، بەڵام بەهۆی "بیری شۆڤێنییەوە" پەسەندنەکران لەکاتێکدا لایەنەکانی دیکە هەزاران پلەی وەزیفییان بۆ  ناوچەکانی خۆیان پەسەندکرد.

وتیشی، ئەوە کێشەیەکی گەورەیە و ئەگەر لە خولی داهاتوودا بگەڕێننەوە بۆ پەرلەمان، هەروەک چۆن دانیشتنەکانیان پەکخست تا یاسای بە پارێزگابوونی هەڵەبجە و گەڕانەوەی زەوی بۆ خاوەنە ڕەسەنەکانیان پەسەندکران، بە هەمان شێوەی تا جێبەجێکردنی ئەو داواکارییەش ڕێگە بە بەڕێوەچوونی دانیشتنەکانی پەرلەمان نادەن.