کۆنگرەی نائاسایی جەهەپە لە ئەنقەرە دەستیپێکرد

ئاڤا نیوز

ئەمڕۆ یەکشەممە لە ئەنقەرەی پایتەخت 22هەمین کۆنگرەی نائاسایی پارتی گەلی کۆماری دەستیپێکرد.

وێنە گەورەکە: دوای ئەوەی چەند ئەندامێکی جەهەپە ناڕەزایەتییان لەسەر ئەنجامەکانی   کۆنگرەی 38هەمینی  2023ی پارتەکە دەربڕی و  ئۆزگور ئۆزێل، سەرۆکی جەهەپەیان بە پێدانی بەرتیل بە ئەندامەکان تۆمەتبار کرد و سکاڵای یاساییان تۆمارکرد، دادگای ئەنقەرە بڕیاری دا کۆنگرەی 38ی جەهەپە هەڵبوەشێنێتەوە و ئەندام و بەرپرسانی ئەو کۆنگرەیەش لە پۆستەکانیان دوور بخرێنەوە و قەیووم لە شوێنی سەرۆکی جەهەپە لە ئیستەنبووڵ دابنرێت.

بڵاوکراوەی فەرمی: ئەمڕۆ پارتی گەل کۆماری (جەهەپە) لە ئەنقەرەی پایتەخت دەستپێکردنی 22هەمین کۆنگرەی نائاسایی ڕاگەیاند و ئۆزگور ئۆزێل، سەرۆکی جەهەپە بە وتارێک دەستپێکردنی کارەکانی کۆنگرە و قۆناغەکانی پرۆسەکەی ئاشکرا کرد، موراد ئەمیر، جێگری سەرۆکی جەهەپەی وەک سەرۆکی دیوانی کۆنگرەکە دیاریکرا، بەپێی ڕاگەیەنراوی جەهەپە ئۆزگور ئۆزێل تەنها کاندیدە بۆ سەرۆکایەتیی جەهەپە و چاوەڕوان دەکرێت 1127 ئەندامی کۆنگرە بچنە سەر سندوقەکانی کۆنگرە دەنگ بدەن بۆ هەڵبژاردنی سەرۆک و ئەندامانی ئەنجوومەنی بەڕێوەبردن.

ئەوەی پێویستە بیزانیت: بەپێی میدیاکانی تورکیا ئۆزگور ئۆزێل، سەرۆکی جەهەپە بە فەرمی بانگهێشتی کەمال کڵچدار ئۆغلۆ، سەرۆکی پێشووی جەهەپەی کردووە  بەڵام ڕەتی کردۆتەوە ئامادە ببێت.

زانیاریی زیاتر:  لە ماوەی دوو ساڵی ڕابردوودا پارتی گەلی کۆماری 3 کۆنگرەی بەستووە کە بە کۆنگرەی ئەمڕۆوە دەبێت بە دوو کۆنگرەی نائاسایی و 22هەمین کۆنگرەی نائاسایی لە مێژووی جەهەپە کە لە ئەنقەرە بەڕێوەدەچێت.