بەریتانیا و کەنەدا و ئوسترالیا بە فەرمی دان بە دەوڵەتی فەڵەستین دەنێن

ئاڤا نیوز

هەریەکە لە بەریتانیا، کەنەدا و ئوسترالیا بە فەرمی دانیان نا بە دەوڵەتی فەڵەستین، بڕیاریشە لە چەند کاتژمێری داهاتوودا چەندین وڵاتی دیکە هاوشێوەی ئەوان دان بنێن بە سەربەخۆیی فەڵەستین.

وێنە گەورەکە: وڵاتانی جیهان دوو دەوڵەتی بە چارەسەر بۆ گرژییەکانی نێوان ئیسرائیل و فەڵەستین دەزانن و داوادەکەن دەوڵەتی فەڵەستین لەلایەن حکومەتی بێلایەنەوە بەڕێوەببردرێت.

لێدوانی فەرمی: کیێەر ستارمەر، سەرۆکوەزیرانی بەریتانیا ڕایگەیاند، ئەمڕۆ بۆ زیندووکردنەوەی هیوای ئاشتی بۆ فەڵەستینییەکان و ئیسرائیلییەکان و چارەسەری دوو دەوڵەتی، بەریتانیا بە فەرمی دەوڵەتی فەڵەستین دەناسێنێت.

حەماس گرووپێکی تیرۆرستییە و سزا بەسەر کەسایەتییەکانیاندا دەسەپێنین، نابێت لە داهاتووی فەڵەستیندا هیچ ڕۆڵێکیان هەبێت.

لەلایەکی دیکەوە: حکومەتی ئوستڕالیا ڕایگەیاند، بە فەرمی دانمان نا بە دەوڵەتی سەربەخۆ و خاوەن سەروەری فەڵەستیندا و دان نان بە فەڵەستین، شانبەشانی کەنەدا و بەریتانیا، بەشێکە لە هەوڵێکی نێودەوڵەتی هاوبەش بۆ بوونیادنانەوەی پاڵپشتی بۆ چارەسەری دوو دەوڵەتی، کە دەستپێکەکەی ئاگربەستێکە لە غەززە و ئازادکردنی بارمتەکانیشە کە لە تاوانەکانی 7ـی مانگی 10، 2023 ڕوویاندا.

هاوکات مارک کارنی، سەرۆکوەزیرانی کەنەدا ڕایگەیاند، وڵاتەکەی بە فەرمی دەوڵەتی فەڵەستین دەناسێنێت بۆ هێنانە کایەی ئارامی لە نێوان ئیسرائیل و فەڵەستیندا.