گۆهدار شێخۆ: بەم نزیکانە 12 هەزار پارچە زەویی دیکە لە زاخۆ دابەش دەکرێن

ئاڤا نیوز

سەرۆکی ئیدارەی سەربەخۆی زاخۆ بە ئاڤا میدیای ڕاگەیاند، قۆناغی دووەمی پرۆسەی دابەشکردنی زەوی لە زاخۆ دەستپێدەکاتەوە و لە داهاتوویەکی نزیکدا 12 هەزار پارچە زەویی دیکە دابەش دەکرێن.

وێنە گەورەکە: ئیدارەی سەربەخۆی زاخۆ، لەسەر ئاستی هەرێمی کوردستان یەکەم شوێن بوو دەستی بە دابەشکردنی زەوی کرد، لە قۆناغی یەکەمدا نزیکەی پێنج هەزار پارچە زەوی دابەشکران، ئێستا سەرجەم نەخشەکان تەواوکراون، بەشی هەموو سوودمەندبووانی سنوورەکە زەوی دابین کراوە.

لێدوانی فەرمی: گۆهدار شێخۆ، سەرۆکی ئیدارەی سەربەخۆی زاخۆ لە میانەی بەشداریکردنی لە گەشتی هەواڵەکانی کاتژمێر 07:00ـی ئاڤا میدیا کە لە شاری زاخۆ بەڕێوەچوو، ڕایگەیاند، لە داهاتوویەکی زۆر نزیکدا قۆناغی دووەمی پرۆسەی دابەشکردنی زەویی لە زاخۆ دەستپێدەکاتەوە و 12 هەزار پارچە زەوی ئامادەن بۆ دابەشکردن، هەروەها هەموو ئەو ناوانەی کە مافی وەرگرتنی زەوییان هەیە، ڕەزامەندی لەسەر ناوەکانیان دراوە.

ئەوەی پێویستە بیزانیت: لەماوەی ڕابردوودا، کێشەی تەرخانكردنی زەویی شیاو و قەرەبووکردنەوەی خاوەنی زەوییەکان، قۆناغی دووەمی پرۆسەی دابینکردنی زەوی دواخستووە، ئێستا ڕێکارە کارگێڕی و یاساییەکان خێراتر کراون بۆ ئەوەی لە ئایندەیەکی نزیکدا پرۆسەکە دەستپێبکاتەوە.

باکگراوند: بە بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەراندا دەستیپێکردووە و دەیان هەزار کەس سوودمەند دەبن، بەمەش فەرمانبەران بەپێی سنووری شارەوانییەکانیان زەوییان پێ دەدرێت.