هۆکاری ڕاگرتنی هێرشی "میلیشیاکانی ئێران" بۆ سەر بنکەکانی ئەمریکا لە عێراق ئاشکرا دەکرێت

ئاڤا نیوز 

 

بەگوتەی سەرچاوەیەکی نزیک لە گرووپە چەکدارەکانی سەر بە ئێران، هۆکاری ڕاگرتنی هێرشەکانیان بۆ سەر بەرژەوەندییەکانی ئەمریکا لە عێراق ئەوەیە کە زیانێکی زۆریان لە ئەنجامی هێرشەکانی ئەمریکا لە کۆتاییەکانی مانگی کانوونی دووەمی ڕابردوو بەرکەوتووە.

 

ئەوەی پێویستە بیزانیت: لە ماوەی ڕابردوودا ئەمریکا هێرشی کردە سەر  نزیکەی 80 ئامانجی گرووپە چەکدارەکان لە عێراق و سووریا، زیانێکی زۆری پێگەیاندن، لە کۆگاکانی چەک و تەقەمەنی و کارگەی دروستکردنی درۆن.

زانیاریی بەدەستهاتوو: بەگوتەی سەرچاوەیەکی نزیک لە گرووپە چەکدارەکانی ئێران تاوەکو هێرشی گرووپە چەکدارەکان تووند بووایە ئەمریکاش تووندتر وەڵامی دەدایەوە، ئەوەش زیانی زۆری پێدەگەیاندن، بەتایبەت دوای کوژرانی چەند فەرماندەیەکی باڵای گرووپە چەکدارەکان.

لێدوانی فەرمی: دکتۆر ئیحسان شەممەری شرۆڤەکاری سیاسی پێی وایە، بڕیاری ڕاگرتنی هێرشەکان بۆ سەر بەرژەوەندییەکانی ئەمریکا لە عێراق و سووریا زیاتر ئێرانییە تاوەکو بڕیاری خۆیان، تاران پێی وایە بەردەوامی هێرشەکان لە عێراق لە بەرژەوەندیی خۆیدا نییە، بەو واتایەی گوشار لەسەر جۆ بایدن، سەرۆکی ئەمریکا دروست دەکات لەبەرامبەر "ڕکابەرێکی دەمارگیر" وەکو دۆناڵد ترەمپ لە هەڵبژاردنەکانی سەرۆکایەتیی ئەمریکا.