وەزارەتی داد: یاسای لێبووردنی گشتیی قەرەباڵغیی زیندانەکانی بە شێوەیەکی بەرچاو کەمکردووەتەوە

ئاڤا نیوز

وەزارەتی دادی عێراق ڕایدەگەیێنێت، یاسای لێبووردنی گشتیی بە شێوەیەکی بەرچاو ڕۆڵی لە کەمکردنەوەی قەرەباڵغیی ناو زیندانەکان هەبووە.

وێنە گەورەکە: لەوکاتەوەی یاسای لێبوردنی گشتیی چووتە باری جێبەجێکردنەوە، تاوەکو ئێستا هەزاران بەندکراو سوودمەن بوونە لە یاساکە و ئازادکراون.

لێدوانی فەرمی: ئەحمەد لعێبی، وتەبێژی فەرمی وەزارەتی داد، بە ئاژانسی هەواڵی عێراقی ڕاگەیاند: "ئەو یاسایە زۆر یارمەتیدەر بووە بۆ کەمکردنەوەی ژمارەی زیندانییەکان و قەرەباڵغیی ناو زیندانەکان." هاوکات ڕایگەیاند، "وەزارەتەکە دەستی کردووە بە دروستکردنی چەند بەشێکی نوێی چاکسازی لە پارێزگاکانی واست، بەسرە، نەینەوا و بەغدا. جگە لەوەش، چەندین بەشی چاکسازی دیکە نۆژەن دەکرێنەوە و فراوان دەکرێن، بە شێوەیەک کە مافی مرۆڤی زیندانییەکان پارێزراو بێت."

لعێبی ئاماژەی بەوەدا: "پڕۆگرامی ڕاهێنانی تایبەت بۆ زیندانییەکان لەناو زیندانەکاندا هەیە. ئەم پڕۆگرامانە بریتین لە خولەکانی دوورین، ئاسنگەری و چەندین کاری دەستی دیکە. ئامانجیش لێی ئەوەیە کە زیندانییەکان فێری کارێک ببن و بتوانن دوای ئازادبوونیان بگەڕێنەوە ناو کۆمەڵگا و ژیانێکی ئاسایی بژین".

باکگراوند: ڕۆژی 2025-02-18، هەر سێ یاسای لێبوردنی گشتیی و باری کەسیی و گەڕانەوەی موڵک بۆ خاوەنە ڕەسەنەکانیان لەڕۆژنامەی "وەقائیع" بەفەرمی بڵاوکرایەوە، بەمەش هەر سێ یاساکە کەوتنە باری جێبەجێکردنەوە.