ئەردۆغان بۆ کڕینی فڕۆکەی جەنگی ئەمریکیی داوای ڕەزامەندی ترەمپ دەکات

ئاڤا نیوز

 

بڕیاروایە ڕۆژی پێنجشەممە سەرۆکی تورکیا و ئەمریکا لە کۆشکی سپی کۆببنەوە و تاوتوێی پەیوەندیە سەربازی و ئابووریەکان بکەن.

 

وێنە گەورەکە: کڕینی سیستمی بەرگریی ئێس 400ـی ڕووسی لەلایەن تورکیاوە بووە هۆی سەپاندنی یاسای "کاتسا" کە ژمارەیەک سزای تووند لەسەر پیشەسازی بەرگریی تورکیا لەخۆ دەگرێت، بە هەمانشێوە بەپێی کاتسا تورکیا لە بەرنامەی پێشخستنی فڕۆکەی ئێف-35  دەرکرا و ئەمەش هۆکاری ناڕەزایەتیی تورکیا و کاڵبوونەوەی پەیوەندی سەربازیی واشنتن و ئەنقەرە بوو.

 

بڵاوکراوەی فەرمی: بەپێی ڕاپۆرتە ڕۆژنامەوانییەکان کە لە سەرچاوە دیپلۆماسییەکانی وەزارەتی دەرەوەی ئەمریکا و تورکیاوە گواستویانەتەوە، ڕەجەب تەیب ئەردۆغان، سەرۆککۆماری تورکیا پلانی هەیە لە کۆبوونەوەی ڕۆژی پێنجشەممە داوای کڕینی زیاد لە 100 فڕۆکەی جەنگی ئەمریکی بکات، یەکێکی دیکە لە داواکارییەکانی ئەردۆغان کە ترەمپ لە ڕابردوودا ڕەتی کردۆتەوە ڕێگەدانە بە تورکیا بۆ پێشخستنی پیشەسازیی بەرگریی ناوخۆی تورکیا و داوای هەموارکردنەوەی یاسای " کاتسا" کردووە بۆ ئەوەی تورکیا بتوانێت 40 فڕۆکەی ئێف-35  کۆمپانیای لۆکهید مارتن بکڕێت.

 

باکگراوند: پەیوەندیە سەربازییەکانی تورکیا و ئەمریکا بە قۆناغێکی ناجێگیردا تێدەپەڕێت بە هۆی ڕازینەبوونی تورکیا بۆ دەستبەرداربوون لە سیستمی ئێس - 400 ی ڕووسی، لە بەرامبەردا یاسای" کاتسا"، تورکیا بێبەش دەکات لە بەرنامەی پێشخستنی فڕۆکەی ئێف-35 و گەشتن بە کەرەستەی چەک بۆ پێشخستنی پیشەسازیی بەرگریی ناوخۆ.