میری قەتەر: ئامانجی ئیسرائیل تێکدانی دانوستانەکانە

ئاڤا نیوز

میری قەتەر ئیدانەی هێرشی ئیسرائیل بۆ سەر وڵاتەکەی دەکات و جەختی لەوە کردەوە کە ئیسرائیل نایەوێت شەڕی غەززە ڕابگرێت بەڵکو دەیەوێت درێژەی پێبدات.

 

چیرۆکی سەرەکی: میری قەتەر ئەو قسانەی لەمیانی بەڕێوەچوونی 80ـەمین خولی کۆمەڵەی گشتیی نەتەوەیەکگرتووەکان لە نیویۆرک کرد.

 

لێدوانی فەرمی: شێخ تەمیم بن حەمەد ئال سانی، میری قەتەر ڕایگەیاند، "ئەوان [ئیسرائیل] لەگەڵ شاندەکان دانوستان دەکەن و پیلان بۆ تیرۆرکردنی ئەندامانی تیمی دانوستانکار دادەڕێژن،‌ هێرشەکە هەوڵێکی ئیسرائیل بوو بۆ پەکخستنی دانوستانەکانی ئاگربەستی غەززە و پێشێلکارییەکی ئاشکرای نۆرمە نێودەوڵەتییەکانە،

 

گوتیشی، "ئامانجی ئیسرائیل لە غەززە ئەوەیە کەرتەکە وێران بکات و دەیەوێت درێژە بە شەڕ بدات''.

 

زانیاریی زیاتر: لە درێژەی قسەکانیدا میری قەتەر سەرەڕای ئیدانەی هێرشی ئیسرائیل بۆ سەر وڵاتەکەی، بەڵام لەگەڵ ئەوەشدا ئامادەیی وڵاتەکەی بۆ درێژەدان بە ڕۆڵی نێوەندگیری بۆ ئاگربەستی غەززە هاوشانی میسر و واشنتن دەربڕی.