بۆ یەکەمجار لە مێژووی دامەزراندنییەوە یەدەگی زێڕی عێراق دەگاتە ئاستێکی پێوانەیی

ئاڤا نیوز

پسپۆڕێکی ئابووری ئاشکرای دەکات، قەبارەی یەدەگی زێڕی عێراق گەیشتووەتە ئاستێکی پێوانەیی کە بانکی ناوەندی پێشتر بەخۆیەوە نەدیوە.

بڵاوکراوەی فەرمی: مەنار عوبەیدی، پسپۆڕی ئابووری، لە پۆستێکدا لە لاپەڕەی خۆی لە تۆڕە کۆمەڵایەتییەکان ڕایگەیاند: "یەدەگی زێڕ لە بانکی ناوەندی عێراقدا گەیشتووەتە زیاتر لە 24 تریلیۆن دینار، بە ڕێژەی بەرزبوونەوەی ساڵانەی 13.3% و بە ڕێژەی 135% بەراورد بە ساڵی 2022."

ژمارەکان وادەڵێن: بەگوتەی عوبەیدی، "بەو پێیە ڕێژەی یەدەگی زێڕ لە بانکی ناوەندیدا 20%ـی کۆی یەدەگی بانکی ناوەندییە کە 123 تریلیۆن دیناری عێراقییە." جەختیشی لەوە کردەوە "ئەم بڕە بە پێوانەیی دادەنرێت و بۆ یەکەمجارە عێراق لە دوای دامەزراندنی بانکی ناوەندییەوە پێی بگات، چونکە یەدەگی زێڕ بە درێژایی کارکردنی بانکی ناوەندیدا هەرگیز لە 20 تریلیۆن دینار تێپەڕی نەکردووە، بۆ یەکەمجارە ڕێژەی بەشداریکردنی زێڕ لە یەدەگەکاندا لە 20%ـی کۆی یەدەگەکان تێدەپەڕێت."

هەنگاوی داهاتوو: ئەو پسپۆڕە ئابوورییە پێیوایە، ئەم هەنگاوە کاریگەری لەسەر واقیعی دارایی و ئابووری عێراق دەبێت و دەڵێت: "گەیشتنی یەدەگی زێڕ بەم ئاستە، بەهای دیناری عێراقی بەهێزتر دەکات، بەتایبەتی لەگەڵ ئەو ناجێگیرییانەی لە دراوە جیهانییە جیاوازەکاندا ڕوودەدەن، لەوانەش دۆلار. بۆیە بانکی ناوەندیی عێراقی هەوڵی داوە ڕێژەی یەدەگەکانی لە زێڕ زیاد بکات، کە لە سایەی ناجێگیرییە داراییە نێودەوڵەتییەکاندا بە فاکتەری ئاسایش دادەنرێت."