ئاڤای خەڵک؛ ژمارەیەک گوندی پێنجوێن داوای قیرتاوکردنی ڕێگاکانیان دەکەن

ئاڤا نیوز

ژمارەیەک گوندی سنووری پێنجوێن بەهۆی خراپی ڕێگاوبانەکانیان نیگەرانن و دەڵێن، نامانەوێ گوندەکانمان چۆڵ بکەین، چەندین ساڵە لە هەوڵداین ڕێگاکەمان بۆ قیرتاو بکەن، بەڵام هیچ سوودێکی نەبووە، بەرپرسانی سنوورەکەش بەڵێنی چارەسەریان پێدەدەن.

چیرۆکی سەرەکی: دانیشتوانی 15 گوندی سنووری قەزای پێنجوێن لە پارێزگای سلێمانی، بەهۆی خراپیی ڕێگاوبانەکانیانەوە ناڕەزایەتی دەردەبڕن و داوا لە حکومەت دەکەن ڕێگاکانیان قیرتاو بکات. ئەم گوندانە بریتین لە ڕەشان، باخی، وشیاری، سێ ماڵە، کوڕەمێوی خواروو، کوڕەمێوی سەروو، توتمان، کانی سێف، تازەدێ و چەند گوندێکی دیکە.

زانیاریی بەدەستهاتوو: عەبدولڕەحمان محەممەد، ئەنجوومەنی گوندی وشیارییە، بە ئاڤای ڕاگەیاند، "زیاتر لە 100 کەس لە گوندەکەماندا دەژین و بڕیارمانداوە چۆڵی نەکەین. چەندین ساڵە لە هەوڵداین ڕێگاکەمان بۆ قیرتاو بکەن، بەڵام هیچ سوودێکی نەبووە و ئێستا هانامان بۆ ئاڤا هێناوە."

لێدوانی فەرمی: ئەمیر جەمال، بەڕێوەبەری پاراستن و چاککردنەوەی ڕێگاوبانی پێنجوێن، بە ئاڤای ڕاگەیاند، پڕۆژەی قیرتاوکردنی ڕێگاکە دەرخستەی بۆ کراوە و لە قۆناغی کۆتاییدایە. "ئەگەر کێشەی بوودجە نەیەتە پێشەوە، ڕێگاکە تاوەکو گوندی کوڕەمێو قیرتاو دەکەین و بەمەش 12 گوندی ناوچەکە سوودمەند دەبن."