ئاڤای خەڵک؛ هاووڵاتیانی گەڕەکی شۆڕشی نوێ لە سلێمانی بێ خزمەتگوزارین

ئاڤا نیوز

دانیشتووانی گەڕەکی شۆڕشی نوێ لە شاری سلێمانی ناڕەزایەتی دەردەبڕن لەسەر کەمی خزمەتگوزارییە سەرەکییەکانی وەک کەمی ئاو، خراپیی ڕێگاوبانەکان و نەبوونی ئاوەڕۆیەکی گونجاو.

زانیاریی بەدەستهاتوو: بەپێی وتەی دانیشتووانی گەڕەکەکە، تەنیا حەوت ڕۆژ جارێک ئاویان بۆ بەردەدرێتەوە، کە ئەمەش ژیانی ڕۆژانەیانی سەخت کردووە. ئەوان ڕایانگەیاندووە کە زیاتر لە 10 جار سەردانی لایەنە پەیوەندیدارەکانیان کردووە بۆ داواکردنی خزمەتگوزاری، بەڵام بێ سوود بووە. یەکێک لە دانیشتووان وتی، "کۆڵانەکانمان پڕن لە خۆڵ و تۆز، ناچارین خۆمان چەوڕێژیان بکەین."

لێدوانی فەرمی: سەرچاوەیەک لە شارەوانی سلێمانی بە ئاڤای وت، دابینکردنی خزمەتگوزارییەکان پەیوەستە بە بودجەوە. وتیشی، "ئاوەڕۆمان بۆ دروست کردوون و لە داهاتووشدا خزمەتگوزاری تریان بۆ دابین دەکەین."

لەلایەکی دیکەوە: لەسەر کێشەی بێ ئاوی، وتەبێژی بەڕێوەبەرایەتی ئاوی سلێمانی، بە ئاڤای وت، بەستنی تۆڕی ئاو بۆ گەڕەکە بێ خزمەتگوزارییەکان پەیوەستە بەو ڕیزبەندییەی کە لە بەڕێوەبەرایەتییەکە دانراوە بۆ ڕاکێشانی تۆڕی ئاو، و کارەکان بەپێی بودجە جێبەجێ دەکرێن.